Thursday, 31 July 2014
Minister Michelle Hooyboer-Winklaar contento cu Dia di Famia na Museo Print E-mail
Thursday, 06 December 2012 12:31

michelle
Ademas di ofrece entrada gratis den fin di siman, Museo Arkeologico di Aruba a organisa varios Dia di Famia ariba diadomingo durante 2012. Esaki a tuma luga ariba peticion di Minister di Cultura Michelle Hooyboer-Winklaar y e actividadnan a resulta den un exito rotundo.

Ariba Dia di Famia, Museo Arkeologico ta organisa cada biaha algo diferente, incluyendo musica, presentacionnan teatral, trahamento di obra di man pa mucha, y mas.

E ultimo Dia di Famia pa 2012, cual a wordo celebra diadomingo pasa, a bay completamente den ambiente di historia, arte y cultura. A pone spotlight ariba e relacion di Aruba y e pueblo Amerindio Wayuu, un relacion cu a wordo reestableci aña pasa cu e bishita di un delegacion di Aruba, encabesa pa Minister Presidente Mike Eman den cuadro di e celebracion di e di 25 aniversario di nos Status Aparte.

Na apertura di e museo pa 10'or di mainta a tuma luga e develo di un canoa coba y forma di un solo troncon di palo pa e pueblo Amerindio di Riohacha, Colombia cual ta hiba e nomber "Wayuu". Presente tabata Minister President Mike Eman, Minister Hooyboer-Winklaar y dr. Weidler Guerra, kende ta un antropologo specialisa y director e filial di e Banco de la Republica na Riohacha. Despues di e ceremonia, dr. Guerra a duna un charla tocante e pueblo Wayu den e auditorio di e museo, muchanan a wordo invita pa traha decoracion di Pasco pa e kerstboom di museo y a cuminsa un bus tour pa bishita tur exhibicion y exposicion den Oranjestad.

Minister Hooyboer-Winklaar ta sumamente contento cu e resultado di e Dia di Famia di Museo Arkeologico, unda cu e meta pa trece e museo y nos comunidad mas cerca di otro a wordo logra y tur expectativa a wordo surpasa. Un gran cantidad di persona di tur edad ta haci uzo di e ocasion y bishita museo ariba e dianan aki. Nos Museo Arkeologico ta bibando un bida hopi dinamico, unda cu ta celebra nos culturanan y intercambio di culturanan, Minister Hooyboer-Winklaar a expresa. E mandatario tabatin palabra di elogio pa e organisadonan, kende cada biaha a presenta un programa nobo y hopi varia, asina a atrae miembronan di nos comunidad pa bishita e Dia di Famia di Museo Arkeologico un, dos y hasta tres biaha. Specialmente nos muchanan y hendenan grandi ta disfruta masha hopi di tur loke ta wordo ofreci.

Arminda Franken-Ruiz, kende ta encarga cu e maneho di e museo, a splica cu e canoa Wayuu lo keda dilanti museo como parti di e exposicion temporal "Boc'i Brik", cual ta cera na augustus 2013. Den weekend lo pone e bela ariba e boto y semper lo tin un hende presente na museo cu por splica con e canoa a wordo traha, etc. El a invita tur hende bin wak e exposicion, sinta den e canoa y siña mas di e relacion di Aruba cu "tera firme" di Sur America.

Minister Hooyboer-Winklaar ta invita un y tur comunidad di Aruba, como tambe nos turistanan pa bishita nos Museo Arkeologico y siña mas di e historia di nos isla. Museo Arkeologico ta habri di diamars pa diabierna di 10or di mainta pa 5'or di atardi y riba diasabra y diadomingo di 10or di mainta pa 2or di atardi.

Esnan cu a bishita e museo diadomingo y a tuma e bus tour a haya un bista den tur e desaroyonan tumando luga pa loke ta trata e promocion di expresionnan di arte, cultura y historia di Aruba. E bus a para na VNO pa e exposicion "One Happy Kingdom", na UNOCA pa e exposicion di Belinda de Veer, Freezone pa e exposicion Caribense/Arubiano di e prome Bienale di Arte di Aruba, Waf Chikito pa un intercambio di e fundacion di amigonan di Rancho, na Museo Historico pa e exposicion di Rita Maasdamme y na Ateliers'89, unda cu un grupo di hoben a presenta un exposicion na honor di e Bienale.

END


Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter