|
Promé Minister Gerrit Schotte a hasi e apertura ofisial di Kampionato Mundial Sunfish awe tardi na Lions Dive Hotel. Despues di un spich impreshonante, Promé Minister a hisa e paña di lona di un di e botonan Sunfish ku tabata na tera huntu ku un di e partsipantenan lokal i asina e di 41 edishon di Kampionato Mundial Sunfish a bira realidat.
Despues di e parti ofisial, Promé Minister a pasa serka tur e timnan di kada un pais i deseá nan tur hopi éksito den e siman binidero. E Kampionato Mundial pa botonan Sunfish lo tuma lugá e siman aki na Kòrsou. Ta e di 41 biaha ku ta tene e regata anual aki, i e di 2 biaha na Kòrsou.
E komishon organisatorio ta spera mas o ménos 75 partisipante di tur kaminda na mundu. Tur aktividat di regata lo tuma lugá na kosta sùit di nos isla, serka di Sea Aquarium Beach i Lions Dive Hotel.
Semper ta un reto pa organisá un evenemento di bela di e magnitut aki den awanan ku ta rondoná Kòrsou. Profundidat di laman ta yega 600 – 800 meter, lo ke ta hasi masha difísil pa ankra e buinan nesesario pa marka e ruta.
Un punto remarkabel ta ku e di 2 Kampionato Mundial Sunfish pa Hubentut lo tuma lugá promé ku e Kampionato Habrí. Aña pasá, na yüli 2010, e promé Kampionato Mundial Sunfish pa Hubentut a tuma lugá na Estados Unidos. Awor aki na 2011, pa promé biaha e di dos Kampionato Mundial pa Hubentut lo tuma lugá pafó di Estados Unidos i un kantidat maksimal di 50 boto Sunfish lo partisipá.
Nabegantenan Sunfish di Kòrsou
For di kuminsamentu di añanan 1970 nos nabegantenan a logra bon resultado den diferente kampionato mundial. E promé biaha ku Kòrsou a partisipá den un kampionato mundial tabata na 1973. Den 120 nabegante, Gert Jan Zeestraten, representando Kòrsou, a gana e di dos premio espektakular.
Den añanan despues, Kòrsou a produsí diferente nabegante ku a logra puesto den e Tòp 10, ku esun kulminante na 1991 durante Kampionato Mundial Sunfish na Kòrsou, ora ku Stephen Smeulders a bira Kampion Mundial.
Den añanan di kampionato anterior, tabata e nabegantenan mas grandi i eksperenshá ku a logra skornan haltu. Resientemente si ta e hubentut ta marka paso, manera a keda demostrá durante e delaster Kampionato Mundial Sunfish na Italia: tres di nos nabegantenan yòn, Ard i Just van Aanholt, i Kevin van Otterdijk a kaba den Top 10.
E espektativanan pa 2011 ta haltu, pero na otro un banda kompetensha di eksterior ta fuerte, pasobra tur pais ta manda nan mihó nabegantenan.
Informashon adishonal di e boto Sunfish
A konstruí mas o ménos 400,000 boto Sunfish for di tempu di e promé tipo. Esei ta hasi e Sunfish e boto di bela mas popular fabriká na mundu. Loke ta asina speshal na e boto Sunfish ta ku a kambia su diseño masha poko durante añanan. Ku un boto di 30 aña un nabegante eksperenshá ainda por partisipá den tòp di kompetensha.
Ta apresiá e kalidatnan di e Sunfish masha hopi den Karibe. E boto ta drif abou den awa, di manera ku su karakterístikanan ta resaltá den bientu fuerte.
Pa un laiko ta kasi imposibel pa kere ku, kontrali na su aparensha, e Sunfish ta un boto apto pa laman grandi. Hasta un mast kibrá, ku pa tur otro boto di bela lo ta motibu pa transmití un señal di emergensia “mayday”, no nesesariamente ta un problema pa e Sunfish. Ounke e boto Sunfish ta chikitu, apénas 4 meter, diferente nabegante a hasi biahenan largu pa Venezuela, pa Boneiru pasa rònt i bin bèk Kòrsou, pasa rònt di Kòrsou.
Kampionatonan Mundial
Na 1951 a konstruí e promé boto Sunfish, di palu. Despues a usa fiberglass pa trah’é pero e diseño original no a kambia masha. E boto Sunfish a bira masha popular na Estados Unidos i a kuminsá organisá kampionatonan, promé kampionato nashonal i despues kampionatonan mundial tambe.
Den kolaborashon ku e fábrika na Estados Unidos na New England, ta pone 72 pa 100 boto Sunfish idéntiko nobo nobo disponibel, pa asina tur partisipante mundial tin material idéntiko pa kompetí.
E promé Kampionato Mundial a tuma lugá na St Thomas, US Virgin Islands i e ganadó tabata e nabegante Merikano Gary Hoyt. For di e tempu ei a tene Kampionato Mundial Sunfish kasi tur aña, mayoria biaha na Estados Unidos, pa asina evitá e difikultatnan di transporte di botonan nobo.
Dos pais europeo (Ulanda i Italia) den pasado a optené e derechi pa organisá kampionato mundial Sunfish. Diferente pais i isla den òf rònt di Mar Karibe tambe a organisá e evento aki: Venezuela, Colombia, Puerto Rico, Repúblika Dominikana, British Virgin Islands i no lubidá Aruba (3x), Kòrsou (1991) i St. Maarten.
For di aña 1970 a tene kuarenta kampionato mundial Sunfish na 17 pais diferente, ku kampionnan mundial di 10 nashonalidat diferente.
 |
Mustra/Kita comentarionan
Mustra/Kita e formulario di comentario
