Pabien na tur hende muhe cu ta activo den deporte

Wednesday, 07 March 2012 16:52

Diaranzon, 8 di maart, lo celebra e Dia Internacional di Hende muher. Rond mundo, den diferente organizacion y na tur nivel di sociedad, lo recorda e lucha cu hende muher mester a hiba pa logra un posicion di igualdad cu hende homber.

Tambe den deporte hende muher tin un tarea importante y ta ocupa cada biaha mas funcionnan di relevancia. Esaki ta danki na e avanze social di e ser femenino, e hecho cu nan a reconoce e interes di hende muher pa deporte, nan capacidad y talento pa sobresali den cualquier ramo di trabou cu nan escohe.

Hende muher awendia ta participa na un nivel casi igual cu hende homber na deporte como atleta. Si nos compara e porcentahe di participantenan femenino durante e Weganan Olimpico di Beijing 2008, por observa cu ya caba esaki a alcanza casi 45%, nificando pues cu tin casi mes hopi hende homber cu hende muher ta participa como atleta na e Weganan Olimpico.

Caminda cu tin un trabou importante pa hasi ainda ta den e areanan di tecniconan, entrenadornan, oficialnan y - muy en particular - na nivel di dirigencia den deporte. Aunke cu Comite Olimpico Internacional na aña 1996 a aproba un resolucion cu ta obliga tur Comite Olimpico Nacional, pero tambe tur Federacion Internacional, Federacion deportivo nacional y en general tur entidad di deporte, pa inclui den nan organonan di decision un minimo di 20% hende muher, nos mester constata cu mucho hopi organisacion deportivo ainda no ta cumpliendo cu e resolucion aki. Tin trabou pa hasi ainda!

Na Aruba Comite Olimpico Arubano tin pa algun tempo caba tres hende muher den directiva: Secretaria General , Nicole Hoevertsz, segunda Secretaria General, Miriam Baiz, Comisario Prisca Albertsz y Comisario desde 2011, Juelle Thode.

Nicole Hoevertsz ta ocupa varios funcion den organizacionnan internacional, entre nan Miembro di Comite Olimpico Internacional. Pa cu oficina di COA nos ta conta cu 3 colaboradoranan administrativo Luzdaris Tromp-Pirela, Fanny Maduro y Julaika Erasmus-Vrolijk. Den tur comision di COA ta conta actualmente cu hende muher, pero ainda no den un cantidad igual cu hende homber. Y si nos mira e 24 Federacionnan deportivo di nos pais, mester constata cu solamente e Federacionnan di Tiro (Willy de la Fuente), Ciclismo (Juelle Thode), Tafel Tennis (Sue-Ann Leong) Bowling (Glenda Driksz) y Volleyball (Mena Curiel) ta conta cu un Presidente femenino. Algun federacion tin un secretaria general femenino.

Pa loke ta e delegacion di nos atletanan elite cu a caba di representa Aruba na e Weganan Panamericano 2011 na Guadalajara, Mexico, e mayoria tabata hende muher. Sin lubida cu den e ultimo anjanan nos atletanan hende muher a sa na saca cara di Aruba cu logro impresionante y historico den weganan regional manera CAC y ODESUR. Asina nos por menciona e medaya di bronz den Weganan CAC na Mayaguez, Puerto Rico pa e atleta di taekwondo Aischal van de Linde, e medaya di bronz den e Weganan CAC na Mayaguez, Puerto Rico pa e equipo di landamento sincroniza, e medaya di bronz den e Weganan ODESUR na Medellin, Colombia pa e equipo di bowling, consisti di Tashaina Seruas, Kamilah Dammers y Shari Albertus.
No ta solamente e logro di medaya ta loke a jama e atencion, tin mucho mas prestacion di nivel di nos atletanan hende muher cu lo ser recorda pa un y tur, sigur esnan recien, por ehempel di e Weganan Panamericano 2011.
Pa menciona algun, e clasificacion di e atleta di natacion, Daniella van den Berg pa e Weganan Panamericano 2011, porcierto e prome den historia di Aruba, e dobbel clasificacion pa final B di e atleta di natacion, Gabriella Ponson.

Tambe mester menciona cu e prestacion di nivel mundial di nos campeon mundial den Freestyle windsurf y awor tambe den Slalom, Sarah Quita Offringa. Por ultimo nos no por keda sin menciona e posicion clave cu Nicole Hoevertsz ta ocupando den Comite Olimpico Internacional, IOC como tambe den ODEPA, cuasualmente ayera diaranzon Sra. Hoevertsz a keda reeligi como miembro ehecutivo di ODEPA. Pues asina ki nos por mira cu nos hende muhernan ta dominando e area deportivo na Aruba.

Pabien!!