|
Hopi a yuda y move cu Tri Bike Aruba |
 |
 |
|
Thursday, 21 June 2012 11:55 |
|
Manera a keda anuncia diasabra Tri Bike Aruba a tene un actividad social cu e meta di recauda fondo. ‘Yuda Un Otro Activo’ tabata un dia completo di movecion den diferente disciplina pa yuda Casa Cuna y Special Olympics. Prome cu esaki, y riba diabierna, gerencia di Tri Bike Aruba a realisa un ceremonia chikito pa marca e aperture official di nan sede na Santa Cruz.
E occasion a conta cu presencia di varios invitado incluyendo socionan comercial, cliente y amigonan. Mirando e demanda pa esaki, a dicidi di inverti y traha riba un expansion di e edificio existente pa asina por ofrece e clientenan di Tri Bike Aruba ainda miho servicio den tur comodidad. Di awor padilanti, ademas di bende bais, pieza y acesorio como tambe haci servicio, Tri Bike Aruba lo ta un Multi Sport Shop. Biniendo bek riba e actividad caritativo, grandi y chikito, amigo y famianan a goza di un dia activo participando entre otro den Mission, Zumba, Spinning, un bike tour y tambe un fun walk. Pa cera cu un broche di oro a sigui move, pero bailando riba e bon musica di Upgrade Music. Caribbean Mercantile Bank N.V. a contagia di e bon boluntad y riba e dia aki nan tambe a duna un sosten grandi na Casa Cuna y Special Olympics pa medio di un donacion di 2.500 Florin. Gerencia y personal di Tri Bike Aruba ta gradici tur esnan cu a duna un man na e proyecto y a hacie realidad. Un danki special ta bay na Richard Kramers, Niurca de Cuba, Rene Wild, Lloyd Wever, Gelou Wever, Special Olympics y Casa Cuna. Un y tur cu no a haya oportunidad di pasa diasabra ultimo ta keda invita pa bin conoce tur e cosnan nobo cu Tri Bike Aruba tin pa ofrece. Tri Bike Aruba ta situa riba caminda grandi di Santa Cruz pa Balashi, schuin dilanti di ex-Rowigini’s. Riba e combinacion di potret ta haya muestra di algun momento agradabel caminda Tri Bike Aruba a ‘Yuda Un Otro Activo.’
 |
Mustra/Kita e formulario di comentario
