|
Un total di shete medaya di oro y un prome puesto overall ta loke nos landadornan a logra riba e prome dia di competencia, un puesto cu nunca antes den historia di CISC no a pasa ainda pa nos seleccionadonan. Apoya pa e publico presente nos muchanan a sa na mustra cu berdaderamente nos por competi contra grandinan manera entre otro Puerto Rico, Santo Domingo, Jamaica, Surinam y Trinidad and Tobago.
Desde e prome salida di e hobencita Florence Kock kende a gana e prome medaya di oro di e CISC 2012, cosnan a mustra di lo bai bira un dia super bon pa Aruba. Na final di e anochi, nos landadornan a logra conkista 16 medaya, di cual 7 tabata di oro, 5 plata y 4 di bronz. Cu esaki Aruba tabata na di prome lugar despues di 30 evento cu 192 punto, sigui hopi di serca pa Trinidad and Tobago cu 191 punto, mientras Puerto Rico a sigui na puesto number tres cu 100 punto. E medayanan di oro a ser conkista pa Florence Kock, Allyson Ponson, Patrick Groters, Mikel Schreuders, Jemal Le Grand, Jordy Groters, Team Relay Girls 15 - 17 cu Gaby y Ally Ponson, Daniella van den Berg y Cindy Maduro. E medayanan di plata a ser gana pa Keeley Maduro, Gaby Ponson, Ashley Bransford, Jordy Groters, Team Relay Boys 15 - 17, Jordy Groters, Renze Postma, Marc Willems y Jemal Le Grand. Por ultimo nos ta haya e medayanan di bronz, esakinan a ser gana pa Florence Kock, George den Dunnen, Renze Postma, Team Relay Fransico y Sylvanio Goes, Dillon Willems y Jonathan Ponson.
 |
Mustra/Kita e formulario di comentario
