| ARBAS: “Aruba destacando den Bowling na Sto Domingo” |
 |
 |
| Wednesday, 27 June 2012 14:57 |
 Aruba ta sigui destaca den bowling regional, participando e siman aki den un campeonato di Caribe na Santo Domingo, den e categoria di 11-15 aña. Atletanan cu ta compitiendo ta: Jair Kelly, Abigail Dammers, Shakaina Querero, Elias Halabi, Osmar Bislip, Renald Thiel, John Elias Thiel y Elgin Nicolaas.
E siman di competencia ta cubri 6 evento, cualnan ta: individual, doubles, team, individual todo evento, team todo evento y masters. Ariba e prome dos dianan nos por a mira resultadonan super bon pa pais Aruba caminda cu den e competencia femenino individual e medayista di oro di panamericano juvenil den e categoria di 11-15 aña – Abigail Dammers - a sa di mantene su liderazgo cu e medaya di oro cu un averahe di 184.8. Den e competencia masculino individual Aruba a logra un empate pa e medaya di plata entre Elias Halabi y Renald Thiel, caminda cu ambos a tira un averahe di 196.2. Riba e di dos dia Aruba a bari cu tur premio den e evento di dobles. Den e di 4 wega ainda e team fuerte di Santo Domingo tabata na di 2 lugar y Aruba na di 1 di 3 y di 4 lugar. Den dobles Aruba tabatin 4 team. Doudles di Aruba a tira tremendo wega y den di 5 wega ta hala e team di Santo Domingo na di 4 luga y dominando e teamnan presente di Puerto Rico tambe. Na prome luga a keda e team di doubles forma pa Elias Halabi (avg. 206.4) y Renald Thiel (avg. 193.6). Na segundo luga a keda e team forma pa Osmar Bislip (avg. 189) y Elgin Nicolaas (avg. 193.6) y na tercer luga e team forma pa Abigail Dammers (avg. 189.8) y John Elias Thiel (183.8). Sin mira atras ariba e nivel di competencia y nos wak e averahenan tira pa e MUCHA nan aki di 11-15 aña nos mester bisa cu nan ta tirando averahenan di adulto cu ta un adelanto enorme. E averahenan despues di 2 dia di competencia te ainda ta: Elias Halabi 201.3, Renald Thiel 194.9, Abigail Dammers 187, John Elias Thiel 185.5, Osmar Bislip 184.5, Elgin Nicolaas 178.5, Shakaina Querero176 y Jair Kelly di apenas 12 aña 160. Tambe por menciona cu Abigail Dammers y Elias Halabi ambos a gana e No Tap event cu a inicia e competencia y ta encabesando e all event individual competencia na di prome luga. Un palabra di felicitacion ta bay pa tur nos bowlernan hoben cu ta representando pais Aruba den gran forma. Y un danki sigur ta bay un bes mas na comision di Subsidio y COA y mas cu claro na coachnan y mayornan pa apoyo duna durante preparacion y pa cu e biahe.
|
Mustra/Kita e formulario di comentario
