Apertura di Special Olympics National Games 2012 tabata bunita y hopi anima

Monday, 10 September 2012 15:11

E di 12 National Games di Fundacion Special Olympics Aruba a tuma luga diabierna anochi na Stadion Guillermo Prospero Trinidad na Dakota. Aki, amigonan di semper, amigonan nobo y dignitarionan a uni cu amigo y famia di e atletanan pa celebra e apertura di e weganan cu a tuma luga diabierna, diasabra y diadomingo.

Entre esnan invitadonan presente tabata Minister Michelle Hooyboer-Winklaar cu pa 9 aña caba tin un amistad bunita cu e organisacion su atleta y voluntarionan; Presidente di Parlamento Paul Croes, Miembro di Parlamento Desiree Croes, Presidente y Secretario General di COA, Roy Mezas y Nicole Hoevertsz y Presidente di ASU, Jerry Franka.

Nos atletanan special, asisti pa studiantenan di Scol pa Polis a core cu e vlam y subi cende e candela.

Tabatin un defile bunita y colorido, unda cu por a ripara cu nos atletanan special ta team up y competi awo tambe cu e hobennan cu ta atende Caiquetio School y Emma School.

Sr. Tuyo Werleman a splica den su discurso cu despues di 12 aña di existencia Special Olympics Aruba ta reorganisando e fundacion y ta invita otro atleta tambe pa participa den nan training y competencianan y den e caso aki por a nota cu un tercera parti di e atletanan no ta miembro di SVGA.

E prome Special Olympics National Games a conta cu participacion di 5ña di existencia Special Olympics Aruba ta reorganisando e fundacion y ta invita otro atleta tambe pa participa den nan training y competencianan y den e caso aki por a nota cu un tercera parti di e atletanan no ta miembro di SVGA.

E prome Special Olympics National Games, cual a tuma luga na LAGO Sport Park a conta cu participacion di 80 atleta special, pero awo tin hopi mas cu e cantidad aki ta participando na e diferente disciplinanan di deporte.

E meta awo di Fundacion Special Olympics ta pa consolida nan luga den e comunidad deportivo, Sr. Werleman a bisa, añadiendo cu nan lo ta firmando acuerdo cu diferente bond y ya caba na e weganan aki nan por a conta cu apoyo di e bond di atletismo pa organisa e parti ey di e weganan.

Gerente General di Digicel, Remko van der Veldt, tambe a hiba palabra, den nomber di e sponsor mas grandi di Special Olympics Aruba. El a dirigi su mes na e atletanan, cu elogio pa nan trabao duro. Sr. Van der Veldt a remarca cu e National Games no ta tocante gana un medaya, pero tocante bira cada biaha miho den un deporte. El añadi cu e atletanan ta bira cada biaha miho pa medio di e cantidad grandi di voluntario cu nan tin pa asisti nan.

Cu orguyo Sr. Van der Veldt a expresa cu pa 9 aña Digicel a apoya y sponsor Special Olympics Aruba y esaki nan lo sigui haci tambe. El a desea tur hende “mooie games” y cu Digicel lo tey presente pa brinda nan apoyo durante e National Games.

Despues di e discursonan, durante cua Minister Hooyboer-Winklaar a expresa hopi admiracion pa e atletanan, e mandatario a declara e weganan habri.

Di biaha despues di e apertura a sigui e prome competencianan di atletismo, cual a bay den un ambiente extraordinario.