Wednesday, 23 April 2014
Gobierno: Protocol ‘Aruba cu Deporte na Pecho’ ta habri hopi posibilidad Print E-mail
Tuesday, 04 December 2012 20:36

deporte protocol

Facilidadnan deportivo den area di Oranjestad y Dakota tabata e promenan pa firma protocol cu Gobierno di Aruba y N.V. Elmar pa reduccion drastico den tarifa cu nan ta paga pa coriente. Reuni na Veld di Riverplate, e dirigentenan di organisacionnan deportivo a expresa un alegria y alivio hopi grandi pa e decision aki producto di Dialogo Social, cu ta habri espacio pa nan por haci mas no solamente den entrenamento y competencianan, pero tambe den loke ta e fondonan disponibel pa adkiri mas y miho material.

Paga menos den recibo di coriente ta nifica cu por sende e luznan mas dia y te mas laat pa duna chens na tur ekipo pa entrena y prepara bon pa nan compromiso. Esey ta opinion di Miguel Micky Martinez, di S.V. Riverplate. Micky tin nada menos cu 52 anja hungando riba e veld. For di un mucha hungado, awo e ta den directiva di e club y el a splica cu nan tin shete ekipo. “Cu scol y trabou ta necesario pa uza veld te anochi.” “Pa nos e ta sigur sigur algo grandi. Nos tabata di bay subi prijs di huur, pero danki na esaki e lo keda mescos. Nos ta un grupo comunitario y esaki lo bay bek na e bario,” asina Dennis Burke, president di Centro di Bario Playa Pabou a duna di conoce. E facilidad tin cancha di baseball y basketball pero tambe ta sede pa actividad di Zumba pa adulto y grandinan como tambe regularmente ta ofrece lecturanan riba un variedad di tema social. Un di e factornan clave den e iniciativa aki di parti di Gabinete Mike Eman ta pa fomenta practica di deporte y movecion fisico sin ta limita na oranan di dia. Lider di SV Dakota y Centro di Bario Dakota, Larry du Clement a duna di conoce cu nan tin entre rond di 250 miembro. “Bo tin cu parti e tempo pa tur haya chens. Esaki ta pone cu nos por habri porta pa mas miembro.” Y no ta solamente e mucha y hobennan cu ta practica un deporte, pero tambe e ciudadanonan di e bario cu ta haci uso di e facilidad deportivo pa cana, move of bin apoya e muchanan mes. Den e caso di SV RCA na Solito, e club ta habri durante dia y tambe ta haci uso di coriente e ora ey. Angelique Simmons, representante di e organisacion a splica. “Loke bo ta spaar den coriente, nos por hinca bek den e club y ekiponan.” Hopi di e facilidadnan deportivo ta habri nan porta tambe pa gruponan di hendenan grandi cu tin tempo durante dia pa tene actividad manera obra di man, movecion fisico y reunionnan di club. Den conclusion e logro di Dialogo Social caminda Gobierno di Aruba hunto cu gremionan comercial y sindical a bay di acuerdo pa sostente deporte y actividad fisico dor di baha e gastonan di e facilidadnan deportivo/social na nos isla ta marca un punto masha importante den e vision di Gabinete Mike Eman pa fomenta un comunidad mas activo, mas cera y mas saludabel. Manera Luis Tromp, dirigente di SV Aruba Junior a indica “E ta un situacion hopi positivo. Nos tin muchanan for di 9 anja caba te na grupo di veterano.” Tromp hunto cu e otro representantenan a firma cu hopi satisfaccion, gratitud, pero sigur hopi speranza di por cuminsa saca probecho y fruto di e beneficio cu nan a cuminsa ricibi di gobierno. E reduccion di tarifa ta efectivo for di consumo di luna di november 2012.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter