| Go Fast! Cycling Team un biaha mas den premio na otro careda di Xtreme Duo |
 |
 |
| Friday, 14 December 2012 17:56 | |||
 Anualmente ta tuma lugar e tan fama Duo Extreme Mountain Bike na e islanan ABC y e anja aki tambe na Sint Maarten. E careda di mountain bike na e islanan ta un careda di pareha unda cu ambos coredor ta competi riba un ruta largo cu ta transcuri gran parti di e isla.
E caredanan aki ta atrae hopi publico y participante di diferente paisnan den region, entre otro, Aruba, Curacao, Bonaire, Sint Maarten, Venezuela, Merca, y te asta di Hulanda. Dia 30 september 2012 e careda aki a tuma lugar na Sint Maarten, dia 21 oktober 2012 na Bonaire, dia 25 november 2012 na Aruba, y a culmina dia 9 december 2012 na Curacao. Participacion na e caredanan aki ta wordo considera como un climax pa e deporte di Mountain Bike y tur coredor ta train y biba pa e momento aki. Finalisa un careda di Duo Extreme ta wordo considera un gran logro, imagina e impacto ora bo gana e careda. Nos coredornan di Aruba, pa varios anja ta e campeonan di e caredanan Duo Extreme na e islanan ABC den diferente categoria. E coredornan di Go Fast! Cycling Team, George Winterdal y Zaida Everon, a logra retene nan titulo di campeon den e categoria overall masculino y damas, representando asina Go Fast! Cycling Team y nos pais Aruba. Cu e logronan aki Go Fast! Cycling Team ta sera su temporada di careda pa anja 2012 gradiciendo e sponsor principal Aruba Trading N.V., su collaborador FysioFit, tur miembro di team y tur cu di un of otro forma ta juda e equipo pa asina sobresali.
|
Mustra/Kita e formulario di comentario
