Karel Williams di Special Olympics: E motivacion cu Digicel ta duna ta un motivacion pa nos tambe sigui!

Sunday, 10 June 2012 19:24

E team nacional y e fundacion di Special Olympics Aruba ta sumamente contento cu e contribucion y apoyo cu nan ta ricibiendo di Digicel como nan sponser entusiasma y stabil. Digicel Aruba a yuda nos atletanan special bay competi na diferente Wega Mundial, como tambe weganan di Surnam y Puerto Rico, entre otro, e director nacional di programa pa Special Olympics Aruba, asina Karel Williams kende ta miembro di directiva di e fundacion, a conta.

Sr. Williams a bisa cu e organisacion ta "super contento" cu e ayuda cu nan ta ricibi pa basta aña caba no solamente pa cu nan biahenen, pero practicamente tur actividad cu nan ta organisa localmente tambe. "E motivacion cu nan ta duna ta un motivacion pa nos tambe sigui," sr. Williams a enfatisa. Di otro banda, e Director di Digicel, Remko van der Veldt a comenta cu e atletanan tambe ta motiva nan amigonan di Digicel. Sr. Van der Veldt a expresa, "Loke ta mas bunita ta cu nan ta hopi entusiasma y nan kier bira miho y ta pone tur nan empeño den bira mas lihe y esey ta refleha di nan y asina nan ta duna nos tambe energia." "Ta importante cu semper b kier bay dilanti y e atletanan aki semper kier bay dilanti. Esey ta echt haci un impacto ariba mi," el a añadi. E partnership di Digicel y Special Olympics Aruba ta di tal indole cu hasta e dos organisacionnan a desaroya hunto un programa di 12 luna pa loke ta trata e actividadnan di Special Olympics, segun sr. Van der Veldt a conta. Ademas di ta e sponser principal di Special Olympics Aruba, e team di Digicel ta gusta atende e diferente actividadnan di Special Olympics. Asina, Van der Veldt tabata e siman aki na stadion ora cu e atletanan special a cuminsa un biaha mas practica atletiek despues di basta tempo. E tabata grita y bati man pa nan, animando e atletanan pa haci nan best. "Nos tin algun atleta cu ta berdaderamente hopi bon den e team y ta bon pa nos ta aki y duna atencion na e hendenan cu ta haciendo deporte," el a comenta cu entusiasmo. Remko Van der Veldt a remarca cu no solamente e atletanan, pero tambe e voluntarionan merece elogio pa nan esfuersonan, cu si tin bon tempo of mal tempo, semper nan tey pa brinda e apoyo asina importante na nan atletanan. Van der Veldt a invita tur hende pa bin wak e atletanan practicando diferente deporte, pa bin anima nan of hasta participa cu nan of ofrece pa traha como voluntario. Esaki "absolutamente ta duna hopi energia," el a conclui.Sr. Williams kier anima tur atleta cu kier participa hunto cu Special Olympics Aruba, esnan cu un talento pa deporte, sea nan ta bay scol na Caiquetio, Paso pa Futuro, Emmaschool of EPB, pa bin participa y goza practicando deporte. El a bisa cu awo sigur nan ta buscando deportista pa uni nan mes na e team di atletiek cual awo ta cuminsando train atrobe despues di algun aña cu nan no a haci esaki. E disciplinanan cu ta wordo ofreci ta coremento 50 y 100 meter, tira bala di softball y bulamento halto. E programa di atletiek ta den man di Wiwi Peña y e entrenamiento ta tuma luga dos biaha pa siman."Digicel den Caribe algemeen ta haciendo un tremendo trabao cu Special Olympics," sr. Cay Cay Williams a comenta, añadiendo, "Sin e yudansa ey nos no lo a yega asina leu."