|
Special Olympics National Games 2012 tabata tres dia yena cu eventonan deportivo alegre y bon anima y atletanan entusiasma cu a lucha y demostra un spirito deportivo extraordinario. E apoyo di e sponsor principal di Special Olympics Foundation di Aruba tabata un biaha mas esencial den realisacion di e weganan nacional.
Ademas, e apoyo moral y animacion di tur fanatico, cual a inclui un grupo inmenso di empleadonan di Digicel tabata loke a motiva e atleta y boluntarionan un biaha mas pa duna lo maximo di nan mes. Cuminsando diabierna cu un bunita ceremonia di apertura, a cende e “vlam” na Stadion Guillermo Prospero Trinidad na Dakota, indicando cu un evento deportivo importante ta tumando luga riba nos isla. Despues di e desfile y palabranan di animo y admiracion di un gran amiga di Special Olympics Aruba, Minister Michelle Hooyboer-Winklaar, como Minister di Asuntonan Economico, Asuntonan Social y Cultura; Sr. Tuyo Werleman, presidente di Special Olympics Aruba y tambe Gerente General di Digicel, Sr. Remko van der Veldt. Despues di e ceremonia di apertura a tuma luga e competencia di atletismo, unda cu atletanan a desplega un profesionalismo grandi. E competencia tabata fuerte, ya cu hopi di e atletanan aki tin experiencia internacional y a duna bon presentacion. Diasabra mainta tempran tabata na turno e atletanan di Badminton, kendenan a pasa hopi bon na Centro Deportivo Playa. Nan a gosa di un tribuna hopi anima y a haci nan best pa duna nan publico un bon demostracion. Diasabra atardi Special Olympics tabatin como deportistanan invita, 4 team di futbol cu a bataya ariba e veld di Britania cu hopi energia. E teamnan tabata consisti di 9 hungado representando Emmaschool y Caiquetioschool. E weganan a wordo hunga riba mita cancha. Aunke e dia tabata hopi calor, e hungadonan a demostra tur loke cu nan tin aden y emocionnan tabata halto, pero nan a demostra di ta bon deportista y hopi sportief den nan bataya. Despues cu tur team a hunga contra otro, Emma School (team geel) a keda na prome luga, sigui pa Caiquetio School na di dos luga, Emmaschool (team berde) na di tres luga y Emma School (team blauw) na di cuater luga. E gran final di e National Games a tuma luga diadomingo mainta cu weganan hopi dibertido y di concentracion intensivo di bolas criollas. Digicel a percura pa un tent grandi pa cuminda y bebida. E ganadonan di e wega final na e evento aki a resulta Cas Shabururi na di prome luga, Centro Sonrisa na di dos luga, Centro Man Na Obra 2 na di tres luga, Brillo di Solo na di cuater luga y Centro Man Na Obra 1 na di cinco luga. Representantenan di Tri-Bike Aruba, como un di nan patrocinadonan y Cruz Cora, como un fiel colaborador, a entrega e premionan. E team di boluntario a haci un trabao extraordinario durante henter e fin di siman, percurando pa sirbi cuminda y bebida pa e atletanan y tur hende presente, pa coordina e weganan, asisti e atletanan y hopi mas. Tabata un fin di siman fenomenal, unda cu Digicel y Fundacion Special Olympics a trece atletanan, famianan, boluntarionan y fanaticonan hunto pa weganan di "National Games 2012" berdaderamente extraordinario! Asina Digicel un biaha mas ta mustra su apoyo na nos hendenan ordinario cu pa medio di loke nan ta haci tin efectonan extraordinario den nos comunidad! Masha pabien na tur participante y na tur e ganadonan! Boso TA EXTRAORDINARIO!
 |
Mustra/Kita e formulario di comentario
