Conta nos kico ABO ta considera Extraordinario Digicel ta rifa un celular samsung galaxy y Pa participa mester sintonisa Power 101.7 FM

Thursday, 20 September 2012 16:02

Awe diabierna dia 21 di september, entre 10or di mainta y 12or di merdia, ehecutivo di mercadeo di Digicel, Elaine Singh lo ta e invitado special cerca Ruben Garcia na radio Power 101.7 FM pa anuncia un gran campaña presentando un premio extraordinario.

Cu su promesa nobo “Ta Extraordinario”, Digicel como compania no ta para central mas den su campañanan, pero ta enfoca mas bien awo riba su cliente y futuro clientenan, riba e persona, e ser humano, kende tur dia, tur ora, ta haci cosnan simpel cu en realidad riba nan mes ta extraordinario of tin resultadonan extraordinario.

Esaki ta bisto den e imagen nobo di e compania, cual ta visibel tur caminda riba nos isla y a haya hopi comentario positivo den nos comunidad.

Dunando realse y engrandeciendo su promesa, cuminsando dialuna awo hunto cu Power 101.7 FM, Digicel ta puntrando comunidad di Aruba: “Kico ABO ta considera Extraordinario?” Durante e programa di 10or di mainta pa 12or di merdia,riba dialuna y diaranzon Ruben Garcia hunto cu Digicel lo duna e oportunidad na cinco oyente pa contesta e pregunta “Kico ABO ta considera Extraordinario?”

“Lo scoge un ganado tur diabierna entre e oyentenan cu yama y comparti nan opinion of experiencia cu nos,” asina Elaine Singh ta splica. E ta añadi “Tur ganado di siman lo wordo inclui den e concurso final, pa cual nos lo anuncia un ganado dia 26 di october 2012, kende lo ricibi e premio extraordinario, un celular Samsung Galaxy Y como premio.”

Scucha e programa di Ruben Garcia na Power 101.7FM y participa bo tambe! Comparti cu henter Aruba kico abo ta considera extraordinario y abo por bira e ganado di un Samsung Galaxy Y!