| E di tres exposicion di Arte titula ‘EARTH’ |
 |
 |
| Sunday, 27 May 2012 20:21 |
|
Na nos turistanan e ta duna un oportunidad di ta den contacto cu nos artistanan local y nan produccion. Na nos hendenan local un oportunidad di bishita e hotel y tambe cera conoci cu obranan di nos artistanan. Na e mes un momento e hotel ta haci uzo di e exposicion pa enrikece su lobby renoba cu e obranan di arte local. Fundacion MANA ta afirma e importancia cu tin den e interaccion di cultura cu turismo. Ya cu arte ta expresion di sentimentonan profundo y alma di un nacion. P’esey ta asina relevante pa e turista bini den contacto mas directo cu nos cultura. E gerencia di hotel tin e mesun filosofia y pa e motibo aki ta sostene no solamente e iniciativa sino ademas di esey riba tur ultimo diabierna di luna, e anochi ta dedica na e folklore y cultura Arubano. Sr. Pierre Kock, director di Food & Beverage di la Cabana Hotel a duna palabra di bonbini na e proyecto aki y a reafirma su vision y e importancia cu esaki tin pa su organisacion. Sra. Maria Teresa Martinez, presidente di e fundacion MANA a duna palabra di gratitut na su coleganan pa e apoyo ricibi pa cu e proyecto y a felicita nan cu e excelente produccion pa e exposicion aki. Tambe a remarca e importancia pa hotelnan haci uzo di arte local. E exposicion a ser inaugura memei di un ambiente festivo y agradabel, caminda cu e artistanan, e hotel y e fundacion hunto cu su invitadonan a conta cu e presencia di drs. Sr. Siegfried Dumfries, director di Departamento di Cultura Aruba, kende a felicita ambos grupo pa nan iniciativa, tanto e gerencia di hotel y fundacion MANA pa cu realisacion di e proyecto aki. E grupo di gerencia di hotel y e directiva di doñonan a asisti manifestando asina di ta hopi contento cu e coleccion nobo aki di e exposicion. Nos di Fundacion MANA ta gradici nan, den nomber di e artistanan local, pa pone espacio disponibel unda artistanan local por expone nan obra. E artistanan cu a participa ta Margriet Blanken, Maria Teresa Martinez, Frank Croes, Michiko Takatsu, Laureen Eman, Denice Gutierrez, Elvis Tromp, Efrain Britten, Eduardo Valbuena, Timothy Charles, Cherry Douglas, Edith de Vogel, Mo Mohammed, Reginald de Palm, Adolfo Valbuena, Nigel Mathew, Charito Chavez, Belinda De Veer, Jany Croes y Danilo Geerman. E exposicion aki lo ta habri pa publico pa e siguiente tres luna. Ta di aplaudi un iniciativa asina cu ta contribui na e desaroyo cultural di Aruba. |
Mustra/Kita e formulario di comentario
