| Sera conoci cu e ganadonan di Arte di Palabra 2012 |
 |
 |
| Monday, 26 March 2012 17:04 | ||||||
 No menos cu 20 hoben a midi forsa contra otro cu nan poesia y storia cortico original y tambe cu declamacion di poesia existente. Cada un di nan a mustra nan talento excepcional riba e escenario di Cas di Cultura. Ademas public presente a ser entreteni debidamente door di un grupo di artista hoben yama “On Set” di Agustinus College y Colegio Arubano. E hurado su tarea sigur no tawata uno facil, paso cada un di e participantenan tawata hopi fuerte cu nan presentacion y obra literario. Na final a saca e ganadonan di cinco diferente categoria cu ta bay representa Aruba na Corsou otro siman den e competencia Interinsular. Ganado di categoria A ta Mirzah Manga cu su declamacion di e poesia “Ami” di Jhon Freddy Montoya. Ana Victoria Kock a sali ganado di Categoria B cu su poesia “Libertad”. Den Categoria C a saca Emanuel Rosel na prome luga cu su poesia “Prisonero di palabra sin bisa”. Na di dos luga a saca Eleen Gillian Rasmijn cu su poesia “Amor y Balor”. Ganado di Categoria E a keda den persona di Osvaldo Correa cu su storia original “Regla Cuenta”. Osvaldo pa di dos aña consecutivo a sali ganado di su categoria den e competencia Interinsular. Y finalmente Paola Thijsen a bira ganado di Categoria F cu su storia original “Humano Imperfecto”. Departamento di Cultura y Grupo Corector di Papiamento kier a gradici tur sponsor cu nan apoyo y contribucion. Danki na Aruba Bank, ATA, Banco di Caribe, Complete Logistics, Romar Trading, Setar y UNOCA. Ademas di bay representa Aruba den e competecia na Corsou, e ganadonan y demas participante ta bay presenta nan obra un bes mas dilanti publico riba Dia Mundial di Teatro. E celebracion aki lo tuma luga riba diamars awo dia 27 di maart den Cas di Cultura for di 8´or te cu 10:30 di anochi. Entrada pa e actividad aki ta GRATIS. Tur hende ta bon bini.
|
Mustra/Kita e formulario di comentario
