Digicel ta honra y orguyoso di por a sponsor participacion di nos hobennan na AIFF Film Lab

Sunday, 01 July 2012 15:59

Diahuebs atardi e popular Film Lab di Aruba International Film Festival (AIFF) a culmina cu e première di e pelicula traha pa e studiantenan cu dianan largo a atende tayernan te na yega na nan producto final.

E tabata un momento hopi special pa e hobennan y otro cursista, como tambe e sponsornan y particularmente pa e productornan di pelicula y profesornan di e Film School di New York University cu a duna e curso.Dr. Carlos Viana a enfatisa con significante e Film Lab aki tabata pa tur e participantenan y cu esaki tabata un oportunidad unico. E participantenan a resulta di ta e grupo di hoben mas talentoso, activo y energetico cu el a yega di traha cun'e, segun sr. Viana. El a gradici Digicel pa ofrece e oportunidad fabuloso aki na e hobennan. El a añadi cu e participantenan ta fortuna y ta danki na Digicel y e hecho cu Aruba su comunidad ta chikito, e grupo aki por a haya e oportunidad cu den ciudadnan grandi lo tabata dificil pa yega na dje. Sr. Viana a gradici tambe e profesornan cu a keda te 5'or di mainta ta yuda e cursistanan pa nan por a realisa un produccion asina increibel den solamente un siman.Gerente General di Digicel Aruba, sr. Remko van der Veldt tabata sumamente satisfecho cu e Film Lab a resulta un exito asina grandi. Digicel ta honra di ta representa na AIFF y ta hopi orguyoso di e produccion cu e cursistanan a presenta, sr. Van der Veldt a bisa. E proposito di Digicel cu esaki no tabata pa e evento ta concentra ariba Digicel. E compania aki su sponsorship tabata dirigi na haci posibel pa nos hobennan experencia film, sigui tras di nan soño y comparti nan storianan, el a subraya.Sr. Van der Veldt a keda hopi impresiona cu e produccion final y a desea pa e cursistanan corda e dianan cu a pasa como e momento den nan bida unda nan a cera conoci cu pelicula, e dia cu nan a cera conoci cu arte y e momento cu nan a realisa "Mi ta capaz pa conta mi storia." Gerencia y personal di Digicel ta felicita e organisadonan di AIFF, tur esunnan cu a inspira e hobennan y e cursistanan durante e siman cu a pasa y tur e participantenan cu un Film Lab exitoso y hopi motivante. Hopi exito y nos ta spera di wak boso aplicando e conocemento cu boso a adkiri aki na un forma positivo den futuro!