Aruba Table Tennis Association ta celebra 60 Aña di Existencia den un forma diferente

Monday, 02 July 2012 14:44

E deporte conosi como ping pong a ser organisa formalmente den un forma di un organizacion dia 26 di juni 1952 bou di e nomber di Aruba Table Tennis Association (ATTA). Un deporte cu den su 60 aña di existencia tabata tin logronan grandi den e region. Diamars 26 di juni 2012 ATTA y su miembronan a celebra 60 aña na un manera diferente caminda diversion cu e deporte tabata centraal.

Pa 5or di atardi e celebracion a inicia cu un discurso di presidente actual, Sue-Ann Leong, contando e muchanan e motibo cu ta tene e celebracion. Despues di esaki e muchanan a haya sorpresa ora a wordo anucia cu lo tin cuater evento riba e mesun dia aki. E prome evento tabata un evento caminda tur hungado a haya un stoel y mester a hunga sinta. Alan Croes ta gana Michel Kelly den semi-final y e otro semi-final tabata entre Zhao Xi ta gana di Jean Pierre Helmeyer. E final entre Alan y Zhao tabata un bataya fuerte pero na final Alan ta keda venci. E di dos evento tabata un evento contrario, pues hunga cu bo otro man, pues. Den e evento aki, Zhao Xi ta bolbe yega final ganando Cheng Kee pa asina titula campeon den e evento aki. E dia ta continua cu e evento di dobles. E evento aki tambe tabata tin su twist. Pa esaki loting a dicidi ken ta forma un team caminda cu un hungado fuerte a team up cu un hungado menos bon. Pero esey no ta tur, ATTA a challange tur e muchanan cu e hecho cu nan tur dos mester a hunga cu solamente un racket! Aki e atletanan Jean Pierre Helmeyer y Robert Dirksen ta topa Michel Kelly y Breiner. Un final sigur cu hopi harimento, e ekipo di Jean Pierre y Robert ta titula campeon. Despues di tur e diversion, ATTA ta sera e dia cu e miembronan hoben cu un torneo normal caminda Michel Kelly ta duna tur hende sorpresa titulando campeon despues di a gana Cheng Kee den final.

Pa e miembronan adulto e mesun eventonan aki a tuma lugar. Cu presencia di algun ex miembro di directiva y tambe ex hungado, presidente actual Sue-Ann Leong pa 8.30 ta inicia e celebracion dunando honor na miembronan pionero y tambe miembronan cu a forma parti di directiva den pasado. Despues di e discurso, e atletanan ta haya e sorpresa di e diferente eventonan divertido cu lo tuma lugar. Campeon di Aruba pa hopi aña caba ta demostra cu e ta gana tur hende sinta tambe. Mario Lobo ta gana Alfred Leong den e final di e evento sinta. Aparentemente Mario no ta e miho hungado cu man robes. Aki Mario no ta yega semi-final perdiendo contra Juni Ras. Juni Ras ta logra yega te final caminda e ta topa Michael Ling kenda tampoco no por a gane. Pues Juni Ras ta sali vencedor di e evento contrario. Den e evento di dobles, pa prome biaha den historia, un mama di un atleta ta titula campeon. Nos ta referi na Celina Munez, kenda alabes ta un voluntario ehemplar di ATTA, hunto cu Mario Lobo ta gana Michael Ling y Maikel Rasmijn den final di e evento di dobles cu un racket. Den e singles normal Mario Lobo ta gana di Michael Ling pa mustra cu te ainda ta e ta e campeon di Aruba absoluto.

Durante e dia, e miembronan di ATTA y tambe miembronan di prensa, a wordo deleita cu musica, snacks y tambe cos di bebe. ATTA a scohe pa no tin premio na e evento aki paso tur e ex miembronan y miembronan actual ta ganado di e celebracion. Sin nan, ATTA no por existi asina hopi aña.

Riba faceook: Aruba Table Tennis por mira hopi mas potret di e bunita celebracion aki.