Switch TV, e programa di Switch Foundation, a lansa diahuebs den Cas di Cultura nan siguiente documentario informativo, uno hopi impactante, cu pa prome biaha na Aruba lo mustra e bida di un adicto ambulante (choller). E documentario aki lo wordo transmiti Dialuna 2 di Juli pa 9:10PM na Telearuba.

E documentario aki lo presenta diferente fase den e bida di e persona; e lo mustra su bida di mucha, despues con ela cay den adiccion, con ela bira un adicto na droga, con ela biba su bida riba caya y su situacion actual.

Switch Foundation hunto cu tur instancia cu ta traha den prevencion y tratamento di adiccion a lansa e documentario cu ta ilustra algun di e motibonan cu ta pone un persona cay den adiccion y e consecuencianan.

Tambe Switch Foundation a anuncia e entrega oficial di DVD di cada programa di Switch TV como material educativo na tur scol na Aruba y tur instancia cu solicita un copia; na unda a scoge F.A.D.A.(Fundacion Anti Droga na Aruba) como e instancia oficial cu lo haci entrega na scolnan durante e aña scolar nobo.

Igualmente Switch a lansa nan website nobo: www.switch.aw hunto cu Parlamento Hubenil.  Switch a splica con e website lo yuda promove actividadnan di arte, deporte y cultura.  E website aki lo keda desaroya di acuerdo cu e necesidadnan cu bin dilanti na unda Switch Foundation, un biaha mas, lo comparti nan producto y lo ofrece ayudo pa promove tur instancia cu tin actividad artistico, deportivo y cultural.  Switch ta kere 100% den trabou den union y ta p'esey nan obhetibo principal ta pa informa y educa di un manera dinamico y actual pa asina comunidad por wordo bon informa.

Riba www.switch.aw lo tin semper disponibel tur e programanan di Switch TV pa asina comunidad por wak nan den e confianza di nan hogar of trabou.

Pa finaliza, Switch kier a recorda y invita fundacion y instancianan pa probecha di e commercial break di Switch TV, pa pasa e TV promo di nan campaña social, actividadnan di arte, deporte y cultura; di manera gratuito.

Switch Foundation ta e prome fundacion multimedia na Aruba cu via medionan di comunicacion (Switch TV y www.switch.aw) ta yuda promove di un manera dinamico y inovativo e trabou di e fundacionan di Aruba y a la vez ta crea programanan cu visualmente ta capta e interes di hoben y adulto.

Si bo organizacion ta desea di promove su website of TV promo, por tuma contacto libremente cu Switch Foundation pa mas informacion via:

www.switch.aw of na paula@switchfoundation.org" target="_blank">paula@switchfoundation.org