Discurso di Prome Minister Gerrit Schotte riba dos di Juli

Monday, 02 July 2012 18:13

Dos di yüli di 2012 ta un biaha mas e fecha pa konsientemente nos para dilanti di nos bandera kanta himno…, sinti den nos kurason orguyo brota pa nos patria…, rekonosé e balornan ankrá den nos tera…, laga e blou di laman, e hel di solo, e blanku di pas den nos bandera kòrda nos ku Kòrsou ta nos pais i nos…, ta su yunan.

Un pueblo ku tin boluntat pa karga responsabilidat i huntu ku su gobièrnu traha duru na bienestar di un i tur. Ta momentu pa nos sinti, ku grandesa di un pais no ta den su tamaño, sino den kreatividat di su hendenan. P’esei ta dushi pa skucha banda di nos Himno, banda di tur e tipo di muziknan di tur dia, tambe Kòrsou su eterno melodia i kant’é nos tur huntu, pasobra retroseso o progreso di Kòrsou ta resultado di aktuashon diario di kada un di su yunan, djaden i djafó, ke men lokal i strañero. Anto futuro, ta preokupashon di nos tur, pasobra ta e direkshon ei nos tur ta bayendo. Ta bon pa enfatisá ku e gobièrnu akí tin bienestar di tur tur hende na pechu. Nos hóbennan i nos grandinan, tur hende ku ta traha na bienestar di e pais akí di nos. Den tur turbulensia ku nos - lidernan di Kòrsou ta den - ta bon pa nos mes i nos tur kòrda… ku semper despues di tormenta solo ta bolbe sali…, basta nos tur ta honrado i nos boluntat ta firme pa buska bienestar pa henter kolektividat. Laga nos rekonosé e kantidat di kos-bonnan ku riba e kaminda ku nos gobièrnu ta andando a tuma lugá kaba i ta tumando lugá. Riba e dia akí mi ta kontentu di por partisipá ku gobièrnu a bini kla ku finansiamentu pa desaroyo di algun bario. Ta un proyekto mashá pegá na nos kurason. Ayera, dia promé di yüli, dia históriko pa nos pais, gobièrnu a firma - na Sint Maarten - ku Hefe di Delegashon di Komishon Europeo na Guyana, un dokumento pa risibí 25 mion florin pa hisa kalidat di bida den barionan di Kòrsou. Ta drecha infrastruktura i tur loke tin di kondusí na progreso pa mas o menos 2560 habitante di e barionan ei. Ban fiha ku konfiansa riba e plannan pendiente pa realisá. Ban rekonosé e logronan di nos paisanonan riba asina tantu tereno diverso. Kaminda por ehèmpel nos hóbennan ta sobresalí den beisbòl na Merka…, kaminda nos hendenan ta logra éksito den asina tantu otro país na mundu… Por sierto, a drenta notisia ku nos Churandy Martina djasabra último a gana medaya di oro na Helsinki, Finlandia, loke ta garantis’é partisipashon na e weganan Olímpiko na Londen na ougùstùs di e aña akí. Komo si fuera esei no tabata basta, ayera diadomingo otro rekord nashonal di 38.34 pa medaya di oro a bai pa e.o. Churandy i Brian Mariano, yunan di nos isla, riba 4xl00 meter. Riba asina tantu tereno kultural, ekonómiko, sientífiko i sosial nos hendenan ta saka kara di nos pais… Den historia di nos desaroyo nos a siña buska ekselensia i nos a siña tambe ku integridat no ta un regalo, sino mas bien un logro ku sodo di frenta. Ohalá tabatin un fórmula - ku pa obra di magia - nos tur huntu por a praktiká i kore ku tur e sintimentunan i e práktikanan negativo ku ta karbachá nos pueblo. Pero mi tin konfiansa den Kòrsou su hendenan. E lema ‘dushi hende’ no ta un lema bashí. Si nos tur afirmá e pensamentu akí i demostrá rèspèt i afekto den nos manera di anda ku otro, nos lo yega na kore ku tur e otro elementonan di komportashon negativo ku riba un dia manera awe lo mi no ke menshoná. Pabien, mi pueblo, ku den nos estado di derecho nos bandera ta balia kontentu den bientu di pariba. Mi ke laga boso ku un pensamentu di San Francisco di Sáles: Nos ta nabegá sano i salvo pasa den tur tormenta, tanten nos kurason ta na su lugá, nos intenshon ferviente, nos kurashi firme i nos konfiansa den Kreador.