| Hobennan di scol basico a haci conoci cu plan BoBario |
 |
 |
| Monday, 02 July 2012 19:56 | ||||||||||||
|
Fuera di wak tur e informacion cu tin den Expo Hall, e muchanan por a mira pa nan mes con e trabounan ta bayendo den caya principal. Nan a ripara con e trahadonan ta instalando e rails pa e Streetcar y esaki a haci di nan experiencia uno mas real y no djis pinta riba mapanan. Armani, un mucha homber di 11 aña a bisa: “Mi a gusta mas esun di tram pasobra ta algo nobo cu nos no tin na Aruba.” Reina de Cuba, docente di klas 5 na St. Anna School a bisa cu loke a hala su atencion ta “E diferente parkenan paso nos no ta conoci aki na Aruba pa diferente parke caminda hendenan por sinta. Personalmente mi ta kere cu ta hopi bon pa dedica tempo pa traha cu mas luganan caminda muchanan por move.” Anthony, di 13 aña a mustra di ta complace cu tur loke el a wak, particularmente con bunita e centro di Oranjestad lo keda. El a bisa: “E ta hopi bon paso nos turistanan ta bin bishita Aruba y ta haya nos isla bon drecha.” E grupo di muchanan no a djis tende durante e mainta aki, pero manera a bisa anteriormente, a percura pa e bishita tabata uno interactivo. E studiantenan a participa dor di haci ehercicionan caminda nan por a diseña nan propio bario segun loke nan ta kere ta haci falta den dje. Pero prome cu e bishita aki mes y for di comienso di e proyecto BoBario, hopi esfuerso ta wordo hinca den motiva instancianan y iniciativanan particular pa traha na bienestar di barionan di Aruba. Sra. Charlene Oduber, ta un di e personanan cu a tuma iniciativa pa yuda hobennan di Bushiri. Bao guia di Sra. Oduber, un otro grupo di hoben hopi motiva, a traha un plan y un maquette di nan Bario Bushiri. Esaki ta contene actividadnan pa hoben, mucha y hende grandi. Di e forma aki e hobennan a demostra cu nan no kier bin solamente cu idea pero ta mustra tambe con nan kier pa e ideanan wordo ehecuta. E maquette aki tambe tawata presente den e sala di exhibicion den caya grandi. Di e forma aki Bo Bario ta stimula grandi y chikito pa tuma iniciativa pa haci nan bario un miho bario. Durante e oportunidad di diabierna ultimo tabata visibel e animo di e muchanan, pero tambe con bon nan ta informa di e necesidadnan den nan bisindario. Natalia, di 11 aña a comenta cu “Nos por a siña mas cos y nos por a wak con e cosnan ta bay ta; con Aruba ta bay keda ora nan caba cu tur e proyectonan” Mayoria di e sugerencia cu a bin dilanti tabata pa parke of espacionan publico caminda nan por hunga, practica deporte y recrea. “Hopi di e muchanan a menciona cu nan kier luganan pa move despues di scol,” Juffrouw de Cuba a indica. Hunto cu e muchanan di St. Anna School a yega tambe un grupo di Fatima College. Tur e muchanan a keda hopi satisfecho cu e bishita y a disfruta di un pasaboca y bebida pa refresca prome cu a bay scol bek. Meta di proyecto BoBario, mester trece un ambiente den cual e ciudadanonan por tin un miho calidad di bida. Esaki lo bay den par cu varios iniciativa riba diferente aspecto, manera por ehempel iniciativanan social y di instancianan gubernamental cu por duna un man den mehoracion di e situacion den cada seccion di nos comunidad. Proyectonan manera renobacion di centronan di ciudad y di barionan, no ta unicamente mehora e producto turistico di Aruba, pero ta haci Aruba un isla mucho mas agradabel pa biba.
Comentarionan (4)Mustra/Kita comentarionan ...
Hopi bon. Nan tambe ta parti di nos comunidad. Laga nan aprecia y conoce con tin di handle cu nos futuro. Cu vision y perseverancia. Nos pais mester bin bek na loke e mester ta. E muchanan tin di aprecia esaki tambe pasobra si no lo bo haya cu Aruba lo por cay den e decadencia di e 8 anjanan ey bek. Hopi bon.
,
July 03, 2012
Duna Comentario y/of Comparti riba Social Medi |
Mustra/Kita e formulario di comentario
