Minister Michelle Winklaar: Boneiro ta un “Partner” natural pa Aruba

Thursday, 05 July 2012 19:01

Un grupo di comerciantenan for di Boneiro a yega Aruba pa un mision comercial organisa dor di Camara di Comercio di Boneiro y ATIA di Aruba. E evento ta tumando luga riba diahuebs y diabierna den Westin Resort y ta conta cu hopi interes. Minister Michelle Hooyboer-Winklaar di Asuntonan Economico, Asuntonan Social y Cultura di Aruba a habri e “Trade Mission Bonaire-Aruba” cu un discurso cu a hala masha atencion.

E mandatario a duna nan un splicacion chikito di kico Aruba ta premira pa e reunionnan den e siguiente dos dianan y despues di esey tambe e potencial cu esaki lo por trece cune pa e negoshinan cu ya caba ta existi entre Aruba y Boneiro pero tambe esunnan cu kier haci negoshi na Boneiro of na Aruba. E mandatario a splica con Aruba a experencia e desaroyo di negoshinan den e ultimo 25 añanan y kico ta e mehoracion nan cu ta haciendo pa por haci e proceso mas facil pa haci negoshi na nos isla.

"Aruba ta buscando partnernan strategico, no solamente na e paisnan mas leu pero sigur e paisnan mas cerca di nos tambe y obviamente e partnershipnan natural cu ta existi den Reino Hulandes mes", asina Minister Michelle Hooyboer-Winklaar a bisa durante su discurso.

E participantenan lo tin un dia hopi yen riba diahuebs y diabierna, yena cu informacion y cu diferente presentacionnan di parternan di Aruba y di Boneiro tambe. "Mi ta convenci cu esaki lo bay resulta den algo hopi positivo. A nota cu tin un natural fit caba, pasobra tin un cantidad di companianan di Aruba cu ya caba a establece nan mes na Boneiro y loke nos kier tambe ta pa por tin un fluho di negoshinan di Boneiro cu por bin habri libremente aki na Aruba”, di acuerdo cu e Minister di Asuntonan Economico di nos pais.

E mandatario a enfatisa riba e cambionan cu a bin awor den e status di Boneiro, cu esey sin duda ta brinda un sin fin di oportunidadnan unico pa comerciantenan di Aruba, pasobra e ta haci nan mercado mucho mas grandi. Mester tene cuenta cu ora referi na Boneiro awor, cu no ta papia solamente di e 10 mil habitantenan bibando riba e isla, sino di un mercado mucho mas grandi.

Na final, e Minister di Asuntonan Economico, Asuntonan Social y Cultura di pais Aruba a bisa e participantenan na e "Trade Mission" cu e ta sigur cu e esfuerso aki lo ta uno masha exitoso. E motibo real pakico e ta pensa esey ta debi cu 47 aña pasa Joe Winklaar di Antriol (Boneiro) a casa cu Gwenny Simon di Dakota (Aruba) y awe e ta mira su mes como un producto bibo di e “samenwerking” entre e dos islanan. Minister Michelle Hooyboer-Winklaar a termina su discurso bisando cu "Mi ta haci un chiste di dje pero e union entre Boneiro y Aruba t’ey pa hopi aña caba, pues loke nos ta buscando awo ta con nos ta fortalece y haci e union mas fuerte ainda y haci'e beneficioso pa tur dos pais. Ami ta e producto di dje!"