Informacion valioso na prome edicion di "Lending with confidence" diaranson

Thursday, 05 July 2012 19:23

Participantenan di diferente sectornan a haya hopi informacion beneficioso na e seminario “Lending with Confidence” presenta pa autor y orador internacional Mandi-Delight Greenidge na Hyatt Regency diaranson.Pa tur esunnan interesa, CIB WORLDWIDE ta presenta e seminario “Lending with Confidence” un di dos biaha, dialuna, 9 juli, 2012 na Hyatt Regency.

Participantenan cu a asisti diaranson a haya informacion extensivo con pa procesa un aplicacion pa credito di manera cu nan por pre-mira e potencial di un cuenta cu por bira delincuente.

Puntra si e lo recomenda e seminario aki na un otro persona den e area di fiansa, Raymond Palm di Setar N.V. a bisa, “Sigur, sigur [lo mi recomend’e], e ta algo nobo pa nos na Aruba, pero e ta importante pa otro hendenan cu tambe ta haci fiansa. No ta banconan so ta haci [fiansa],” Palm a bisa.

“Bo tin Inspectie tambe cu tin outstanding balances cu pagadonan di belasting y tambe otro negoshinan cu ta duna credito. E ta importante pa nan por haya un indruk imparcial di e cliente cu nan ta purba di duna servicio,” Palm a agrega.

E grupo cu a asisti tawata di diferente sectornan cu ta toca e parti di extende credito na clientenan of colecta for di clientenan delincuente, incluyendo Aruba Bank, Kloes & Partners, Setar N.V., y Bon Bini Cargo.

Lisette Danker di Aruba Bank a bisa cu e seminario tawata, “Hopi interesante. E ta yuda bo wak e proceso di duna credito for di un otro invalshoek. E parti di e strategia pa recovery tawata hopi bon.”

Danker a menciona tambe cu e ta haya e seminario lo ta specialmente di beneficio pa esnan den retail y den incasso.

Na e seminario, e orador, Greenidge tambe a introduci e concepto pa un kantoor di credito pa e mercado di Aruba. E la splica tur e beneficionan cu e kantoor di credito lo por ofrece pa tur negoshinan cu ta extende credito y con hopi e lo yuda nan minimalisa nan riesgo ora di extende credito.

Tocante e concepto di un kantoor di credito, Palm di Setar a bisa, “ Mi ta kere cu si bo kier tin un Aruba cu ta sigui progresando y bayendo di un maneho di tempo nobo, e ta importante [pa tin].”

Palm a bisa tambe cu pa Aruba por progresa na nivel internacional, un kantoor di credito ta importante pa introduci na e mercado local.

“E lo duna mas seriedad na business, y lo crea business opportunity y ta haci cu bo por uza miho judgement ora di evalua aplicacionnan pa credito.

Pa registra pa e di dos seccion di “Lending with Confidence” contact Nancy Croes na nancy@cibworldwide.com of na 594-1695 of 568-7387.