| Turismo ta mustra mihor resultadonan desde e caida economico di 2009 |
 |
 |
| Thursday, 05 July 2012 20:29 |
|
Den e di cuater trimester di 2011, turismo a sigui produci bon resultado cu un crecemento di 2,7 porciento te na 213.481 bishitante compara cu e mesun trimester di 2010, e subida mas halto desde e caida economico di 2009. E mercado Latino Americano a expande cu 6.785 bishitante (+15,1 porciento) y a sigui carga e mehoracion den turismo. Sinembargo, Aruba su mercado principal, Merca, a cay cu 2.984 bishitante (-2,4 porciento), parcialmente splica door cu e winter di 2011/2012 tabata e di cuater periodo mas cayente den e ultimo 117 aña. Di otro banda, turismo crucero a mengua cu 4.134 pasahero (-2,0 porciento) te na 206.934 pasahero, despues cu 11 barco menos a yega e waf di Aruba. Den su totalidad, ingreso relata na turismo a crece cu 3,6 porciento compara cu e mesun trimester di e aña anterior (e di cinco trimester consecutivo di crecemento). Ademas, e “Business Perception Survey” (BPS) pa e di cuater trimester di 2011 a indica cu empresanan tabata positivo riba e situacion economico actual y esun di e futuro cercano di Aruba. E indice di e BPS, cu ta refleha e condicionnan economico actual, a nota su resultado mas halto (105,4) desde e di dos trimester di 2005 (107,1). Banda di e sentimento positivo di empresanan, e sector di construccion a duna un prestacion positivo refleha den e cantidad di permisonan pa construccion otorga, cual a expande cu 2,9 porciento, y e cantidad di instalacionnan electrico aproba, cual a crece cu 28,1 porciento. Ambos compara cu e mesun periodo di 2010. Importacion di cement a crece substancialmente (38,2 porciento) na 2011 indicando un sector di construccion activo pa e aña 2011 den su totalidad. Durante e ultimo trimester di 2011, e cantidad di petroleo refina a cay cu 40,1 porciento, esta, di 17,1 miyon bari den e di tres trimester di 2011 te na 10,3 miyon bari den e periodo actual di analisis. Margennan chikito di crudo pisa y e sensibilidad di e ganashinan di e refineria riba nan a hunga un rol principal den e bahada di produccion aki. Door di esaki e balor di petroleo importa a cay cu 61,1 porciento te na Afl. 1,2 biyon, y e balor di petroleo exporta a cay cu 43,2 porciento te na Afl. 1,7 biyon compara cu e mesun trimester di 2010. Un subida di prijs (+6,3 porciento) a wordo nota den e trimester actual (e nivel di inflacion trimestral mas halto desde e di tres trimester di 2008). E crecemento aki tabata primordialmente door di subida di prijsnan den e componentenan di vivienda, transporte, cuminda y bebida no-alcoholico, y bebida alcoholico y tabaco. Pa 2011 inflacion a yega 4,4 porciento (promedio di 12 luna), cual ta un tiki mas cu dobbel e resultado di 2010. Ora exclui e componentenan di energia y cuminda, e asina yama “core inflation” a yega 1,2 porciento. Ingresonan di gobierno den e di cuater trimester a aumenta cu Afl. 32,2 miyon te na Afl. 264,8 miyon (5,5 porciento di GDP nominal), e nivel mas halto desde e di cuater trimester di 2009, y a refleha aumentonan den ambos ingresonan di impuesto (+Afl. 27,7 miyon) y di no-impuesto (+Afl. 4,6 miyon). E total di gastonan (incluyendo cambio den pagonan atrasa) a crece cu Afl. 1,0 miyon te na Afl. 319,7 miyon (6,7 porciento di e GDP nominal), manifestando expancionnan den productonan y servicionan (+Afl. 15,5 miyon), gastonan di personal (+Afl. 10,2 miyon), y gastonan di interes (+Afl. 5,7 miyon). Consecuentemente, e deficit financiero (incluyendo e cambio den pagonan atrasa) a yega Afl. 59,1 miyon den e di cuater trimester di 2011, igual na 1,2 porciento di e GDP nominal. Na final di December 2011, e debe total di gobierno a suma na Afl. 2.771,9 miyon, un subida di Afl. 223,7 miyon (+8,8 porciento) compara cu e posicion na final di September 2011. Pues, e debe total den porcentahe di GDP a subi cu 3,9 punto di porcentahe te na 57,8 porciento na final di December, e nivel mas halto registra. Pa locual ta trata desaroyonan monetario, e cantidad di placa den circulacion a mengua cu Afl. 43,6 miyon te na Afl. 3.158,6 miyon durante e di cuater trimester di 2011, e di dos trimester consecutivo di bahada. Esaki ta refleha un combinacion di tanto factornan domestico como di exterior, caminda e componente domestico di e cantidad di placa den circulacion a baha cu Afl. 106,7 miyon, compensa parcialmente door di un subida di Afl. 63,1 miyon den e fluho neto di fondo for di exterior. Credito bancario neto na e sector publico a cay cu Afl. 137,7 miyon, resultado di un subida den gobierno su depositonan na e sector bancario (+Afl. 137,6 miyon). Un factor grandi cual a conduci na esaki ta tabata e bononan emiti door di gobierno na November y December 2011 pa un total di Afl. 230,5 miyon. Credito bancario na e sector priva a expande cu Afl. 32,2 miyon, causa primordialmente door di un subida di fiansa na empresanan (+Afl. 24,0 miyon) y di fiansa pa construccion di cas (+Afl. 8,1 miyon). Di otro banda, credito na consumidor a keda debil (+Afl. 0,5 miyon), posiblemente indicando consumidornan cauteloso pa tuma fiansa, y tambe e consolidacion di credito na consumidor den fiansa pa construccion di cas. E reservanan internacional di divisa (incluyendo e diferencia den revaluacion di oro y di reservanan internacional oficial) a suma na Afl. 1.493,6 miyon na final di December 2011, representando 4,7 luna di cobertura di pagonan di e cuenta coriente (promedio di 12 luna, excluyendo e sector di petroleo). E cobertura aki a bin ta cayendo continuamente desde e di tres trimester di 2010. E balansa di pago a registra un recuperacion fuerte den e di cuater trimester di 2011 (surplus di Afl. 63,1 miyon) compara cu e di cuater trimester di 2010 (deficit di Afl. 118,7 miyon), resultando den un fluho neto similar di fondo for di exterior. E surplus aki ta coresponde na 1,3 porciento di GDP nominal, y tabata esun mas halto den tur e cuater trimesternan di 2011. E cuenta coriente di e balansa di pago a registra un surplus di Afl. 93,1 porciento (1,9 porciento di GDP nominal), y tabata primordialmente e resultado di un crecemento fuerte den e cuenta di mercancia, relata na reinicio di e operacionnan di e refineria. E subida den e cuenta di mercancia a wordo parcialmente mitiga door di un fluho pa exterior di ganashinan y dividendonan. E ultimonan aki a expande e deficit di e cuenta di ingreso te na Afl. 321,3 miyon. E cuenta di capital y financiero a registra un deficit di Afl. 28,5 miyon den e di cuater trimester di 2011, principalmente pa motibo di un salida grandi di fluhonan neto relata na inversionnan directo pa un total di Afl. 312,3 miyon. E fluho di divisa aki a wordo pa gran parti compensa door di un fluho neto for di exterior di Afl. 200,6 miyon, relata na otro inversionnan (principalmente credito di comercio). [1] E version na Ingles ta prevalece. E boletin aki no ta tene cuenta cu e desaroyonan recien pa cu e refineria, cualnan lo por forma un riesgo significante pa e economia Arubano. Comentarionan (6)Mustra/Kita comentarionan ...
Segun expertonan , e unico motibo pakiko e crisis econimico aki a dura asina hopi no ta paso hende no tin placa sino hende tin miedo y ta gasta nan cen mas conciente......pero por saca afo cu poco poco economia ta stabilisando. Cu esey mi kierman mundialmente.
Cu su tempo aruba tmb lo benificia di dje.
,
July 06, 2012
...
Bla Bla Bla realidad ta otro. Hotelnan keto bai bashi, negoshinan ta cera na monton. Valero ta CERA!. Esaki tin efecto ariba nos economia. Nos deficit a jega biyones caba. E banco aki por scirbi kiko cu e kier, kizas bow preshon politiko, pero Aruba ta chikito y nos ta mira y sinti si cos ta bon of cos ta malo. Cos ta bon pa Gobernantenan y stranjeronan. Hopi Arubiano mes ta pasa trabow pa sobrevivi den e pais rico aki.
,
July 06, 2012
Duna Comentario y/of Comparti riba Social Medi |
Mustra/Kita e formulario di comentario
