Distincion special pa Claret Lopez y Franky Kuiperi di Lions international

Friday, 06 July 2012 19:34

Durante un reunion internacional di clubnan regional di districto E-1 na Caracas, Venezuela dianan 18 y 19 di mei, Aruba Lions Club a wordo representa pa sr. Claret Lopez y sr. Franky Kuiperi kendenan tin hopi aña trahando na bienestar di e comunidad di Aruba.

Como un reconocimento pa nan valioso trabao desplega, na e Convention District E-1, cu a tuma luga na e conocido centro CCCT, Franky Kuiperi y Claret Lopez a ricibi distincionnan internacional for di autoridadnan di Lions Club. Ta un placer pa Aruba Lions Club conta cu miembronan cu no solamente ta haci nan maximo esfuerso na bienestar di e comunidad di Aruba, pero nan trabao duro ta refleha pafo di Aruba y ta un ehempel pa hopi miembro localmente y internacionalmente. Claret y Franky a wordo scogi for di un grupo di 35 compañero cu a wordo nomina pa un reconocimento pa Past Governor German Ferreira. Sr. Ferreira a scoge e 35 miembronan for di e mas di 1000 miembro cu tin den e Districto E-1. E reconocimentonan cu na a ricibi ta wordo presenta den nomber di Presidente Internacional di Lions Club como reconocimento y muestra di aprecio pa trabaonan excepcional desplega durante 2010-2011. Aruba Lions Club a ricibi dos di e 15 reconocimentonan otorga. Director Internacional Carlos Valenca Valencia a entrega e distincion "Excellence Award" como Zone Chairman di Zone 1 Districto E-1 den nomber di Presidente Internacional Sid Scruggs na Franky Kuiperi. Claret Lopez, e presidente saliente di Aruba Lions Club, a wordo honra cu e "LCI President Excellence Award" pa su trabao desplega durante aña 2011-2012 como presidente. Sr. Lopez a ricibi e reconocimento for di man di Past Internacional Director Fransisco Fabricio de Oliveira Neto, kende ta candidato pa bira Presidente di Lions Club Internacional pa 2013-2014. Aruba Lions Club ta felicita nan Fellow Lion Claret y Fellow Lion Franky cu nan reconocimento di excelencia, cual ta refleha e dedicacion y perseverancia cu nan a desplega durante 2010-2011. Ta un gran honor pa Aruba Lions Club por conta cu dos miembro cu a ricibi "Excellence Awards" e aña aki, specialmente si tuma den consideracion cu ta solamente 15 reconocimento a wordo otorga entre 1000 miembro.