| Tiramentu ku un herido na Koral Specht |
 |
 |
| Friday, 06 July 2012 20:30 | |||
|
Djabièrnè, 6 yüli 2012 alrededor di 20.02’or Sentral di Polis a dirigí un patruya na Kaya Dori na Koral Specht pa un kaso di tiramentu. Na e sitio e patruya a bin topa ku un hòmber ku herida di bala na su pia robes ku tabata sangrando. E víktima a keda transportá ku ambulans pa Poliklínika di St. Elisabeth hospital ku urgensia pa tratamentu médiko. For di un investigashon preliminar ku polis a realisá na e sitio, a resultá ku e hòmber víktima di 28 aña, nasé na Kòrsou, tabata para na su outo ta kombersá ku un otro persona dilanti di un kas na e kaya ariba menshoná. Na un momento dado un hòmber lomba sunú pia abou a kana yega serka i a los tiru dirigí for di un arma di kandela riba e víktima ku e konsekuensia ya menshoná. Despues di su akto e hòmber aki a sigui kana na pia bai for di e sitio. Te na e momentunan aki e motibu di e tiroteo no ta konosí. Polis a konfiská dos (2) vehíkulo ku tabata para den e kaya ku a risibí perforashon di bala pa mas investigashon. Departamentu di Reshèrshi ta kontinuá ku e investigashon. Teps: Tur tep ku tin riba e kaso aki ta keda bon bini. Ta supliká tur persona ku ta kere ku nan tin informashon riba e kaso aki, pa pasa e informashon aki pa Reshèrshi na numbernan: 8666-218/8666-219(ora di kantor) òf 911 (24 ora pa dia). Number anónimo: 108 (e number aki ta duna tur garantia di anonimidat).
|
Mustra/Kita e formulario di comentario
