| Aruba ta debuta cu empate contra Puerto Rico |
 |
 |
| Friday, 06 July 2012 23:03 |
|
E seleccion hubenil a debuta cu un empate contra Puerto Rico den un wega caminda cu e condicionan di tereno y tempo a hunga un rol basta grandi riba e prestacion di e team, pero asina mes e mucha nan di Aruba a demostra coraje y a sali busca e wega for di comienso. Aruba ta sali liher y sorprende tempran ora cu nan ta bai ariba na di 9 minuut cu un tremendo gol di David Dubero. Riba un hugada di bala para pafor di e area grandi David Dubero ta cobra magistral. Cu un tiro cu a parce un missil, e bala ta pasa riba e barera y riba cabez di e portero pa bai para den net pa duna Aruba e ventaha di 1-0. Despues di e gol aki Puerto Rico ta purba reacciona, pero e defensa di Aruba comanda pa Nickenson Paul a hala faha mara y logra wanta e ventaha te cu halftime caminda e wega ta bai aden 1-0. E mucha nan di Aruba a cuminsa e wega un tiki nervioso y tawata tin hopi bruhashon den nan wega, pero den di dos tempo Aruba ta sali mas tranquil y ta cuminsa produci algun hugada peligroso dilanti e gol di Puerto Rico pero tanto Marcial Kock, y Benedicto v/d Biezen ta faya den e momento crucial nan cu por a defini e wega pa Aruba. Di otro banda e team Boricua tawata tin basta problema pa sali y forma atake nan riba e gol defendi pa Brandon Malmaceda cu te na e momento nan no tawata tin mucho trabou. Segun e minuut nan tawata pasa e victoria tawata mustra posibel, pero na di 80 minuut un bruhacion den e linja nan di defensa y medio campo ta produci un contra golpe y Puerto Rico ta empata e wega na 1 gol pa banda. Despues di e gol aki ambos seleccion ta sigui busca e gol di victoria. Brian Dorothal ta hanja un bunita oportunidad di duna Aruba e victoria pero su tiro ta sali mucho halto. E wega ta termina 1-1 y asina Aruba ta piki su promer punto den e grupo. Aruba a sali cu e siguente alineacion: Brandon Malmaceda, Nickenson Paul, Jannick Tromp, Carl Geerman, Juan Pablo Suarez, Chito v/d Biezen, Kevin Villar, Marcel Kock, Benedicto V/d Biezen, Juan Trenidad y David Dubero. Aruba a haci dos cambio caminda cu na di 60 minuut Brian Dorothal a drenta pa Juan Trenidad, y na di 75 minuut Owen V/d Wijne a drenta pa Marcial Kock. E proximo compromiso di e seleccion hubenil lo ta dia 7 di July, diasabra awor contra e donjo nan di cas, e fuerte seleccion di Cuba. E wega ta programa pa 5 or di atardi. E moral nan ta halto y Aruba lo sali pa duna Cuba bebe awa di tiwari. Un apelashon ta bai na tur e pueblo di Aruba pa duna un sosten moral cu un orashon pa duna e mucha nan forza dilanti e compromiso importante aki. Pa mas informashon riba nos seleccion subi riba e website di www.avbaruba.aw of sigui nos riba facebook www.facebook.com/avbaruba Biba Aruba! |
Mustra/Kita e formulario di comentario
