| Minister Arthur Dowers a topa cu studiantenan na Utrecht |
 |
 |
| Monday, 09 July 2012 12:21 | ||||||
 Durante su biahe di trabao na Hulanda Minister di Husticia y Enseñansa, mr. drs. Arthur Dowers a tene un intercambio cu un grupo di hoben cu ta trahando duro ariba nan futuro den diferente ramo di estudio.
E reunion na Hogeschool Utrecht tabata uno hopi ameno y aunke a wordo papia tambe di experiencianan placentero, Minister Dowers tabata hopi interesa pa tende tambe kico ta e retonan y problemanan actual cu nos studiantenan ta experiencia na Madre Patria. “Naturalmente mi ta keda informa via di informe y raportnan con ta bayendo cu nos studiantenan, pero mi ta haya importante pa tende di nan personalmente tambe,” Minister Dowers a enfatisa. E mandatario a encurasha e studiantenan pa papia cu confiansa y tur libertad y esaki ta loke nan a haci tambe, expresando nan mes tocante retonan di nan studio, pero tambe tocante asuntonan mas personal manera probleman psicologico. “Mi ta contento cu e studiantenan a papia libremente. Esaki ta duna un balor añadi grandi pa mi na e encuentro aki. Naturalmente nos no ta capaz pa resolve tur problema. E cultura hulandes y maneho di ministerio di enseñansa na Hulanda ta hunga un rol y mi no por cambia nada na esey. Pero ta bon pa haya confirmacion un biaha mas con importante e ta pa studiantenan cu kier studia den exterior prepara nan mes bon, cuminsando pa pensa hopi bon ariba nan area di studio. Esey na prome luga ta e responsabilidad di e studiantenan, pero nos como Gobierno tambe ta interesa pa e studiantenan ta exitoso. Esey kiermen cu nos mester mehora e informacion na Aruba mas y tambe cu Arubahuis via di e mentornan y e opvangcommissienan local reacciona cu mas atencion ariba preguntanan y problemanan cu por presenta,” Minister Dowers a comenta. Ademas, sr. Dowers a puntra kico nan consehonan ta pa nos futuro studiantenan. E contestanan di esnan cu e minister a papia cun'e no solamente ta refleha con pa identifica retonan y guia e hoben miho, pero tambe ta demostra nan creatividad den haya solucionnan cu por wordo aplica den situacionnan similar door di otro hobennan. Minister Dowers a keda hopi contento di por a reuni cu algun di e studiantenan di Aruba na Hulanda. Sr. Dowers ta desea tur nos studiantenan un dushi vakantie y hopi exito cu nan estudio y, naturalmente, e ta spera di wak nos hobennan bek na Aruba cu nan diploma den nan man, cla pa traha na bienestar di nan comunidad.
|
Mustra/Kita e formulario di comentario
E cos cu e minister mester haci ta, coi e problema na su raiz. Drecha Arubahuis su departamento di onderwijs.
Nan ta traha 0,0 , 95% di biaha nan no ta coi telefoon of ta bisa nan ta jamabo bek pero nada.
E unico cos bon cu e departamento ta haci ta regla e binimento di studiante nan voor de rest nada mas. E pago mensual tambe tin biaha ta jega laat. Dus Dowers eynan e problema ta. Mep no a drecha e problema, AVP a bin pone un hoofd nobo hopi bon, pero despues di un par di luna a weg e, paso directeur no tawata guste i awo a bin cu un otro hoofd un meneer di colegio, cu ta hari cubo bisa tur cos ta sali bon, pero no por resolve nada e mes. E ta manda tur hende bek na Navas cu ta un trahado di e departamento. AVP mester trece e hoofd bieuw bek!, Desiree a bay toch. E hoofd bieuw tawata strit tur hende incl e mentor nan cu no tawata haci nan trabou bon.