Ministerio di Cultura ta informa: Arte Mobil ta bishita Bo Bario

Wednesday, 11 July 2012 19:04

Minister Michelle Hooyboer-Winklaar tambe a pinta den e Arte-Mobiel den Village na San Nicolas. Un bus di Arubus yena cu papel, material pa pinta y un gran cantidad di buki a sali 4.30 pm for di UNOCA cu direcion pa Village na e ‘Basketball Court Village’ na San Nicolas.

E asina yama ‘Arte Mobil’ ta forma parti di e plan vacacional di Bo Bario, hunto cu diferente departamento y instancianan gubernamental. Den e ‘Arte Mobil’ aki, e artistanan lo ta dunando e hobennan splicacion e.o. kico ta arte, con e bida di un artista ta, kico kiermen tene exposicionnan cu tur hende por bishita. Tambe ta duna splicacion di e Prome Encuentro cu Bienal cual lo tuma luga na Aruba cuminsando e luna aki. Lo tin un sesion di creatividad e.o. pintamento y tambe ta mustra riba e importancia di lesamento door di entrega buki na final di atardi na cada hoben participante. E bukinan aki a ser ricibi for di Departamento di Enseñansa, UNOCA y Charuba cu lo sirbi como meta pa stimula lesamento y e amor pa literatura. ‘Arte Mobil’ lo ta biaha den e vakantie aki for di 10 di juli te cu 26 di juli 2012 rond di Aruba y ta bishitando diferente bario pa laga muchanan cera conoci un tiki cu arte. Tur dia di siman e ekipo di boluntario ‘Arte Mobil’ lo ta den diferente bario. Diferente artista ta coopera cu e proyecto y asina cada dia e ‘Arte Mobil’ por conta cu un cara nobo hunto cu diferente boluntario. Tambe Annefleur Siebinga, un stagiaire di Ciencia Cultural for di Hulanda ta forma parti di e organisacion Arte Mobil aki. Diamars atardi durante bishita na e ‘Basketball Court Village, Minister Michelle Hooyboer-Winklaar hunto cu e hobennan a demonstra su talentonan artistico den arte di pintura na e hobennan. Na final di atardi, ora a yega turno pa e muchanan bay pa otro actividad, cada mucha a haya buki regalo. Un hoben cu a pinta tabata asina orguyoso di su obra cu ela bay busca su mama pa mustra su obra di arte y a puntra si e obranan cual a wordo traha y cu a forma e palabra ARTE MOBIL lo bay den exposicion tambe! Otro hoben a puntra si ‘Arte Mobil’ lo bolbe mayan atrobe. E remarca aki ta un muestra chikito di e exito di e atardi aki di e proyecto vacacional Bo Bario y Arte Mobil. E bishita di e ‘Arte Mobil’ den diferente barionan lo ta di dialuna pa diabierna for di 5’or pa 7’or di anochi; riba dianan: 11 di juli na Centro di Bario Brazil; 12 di juli na Jara Complex, Savaneta; 13 di juli na Club Universal, Pos Chikito; 16 di juli na Veld di Sportboys, Sta. Cruz; 17 di juli Veld di Britania, Piedra Plat; 18 di juli na Club Caiquetio, Paradera; 19 di juli na Centro di Bario Tanki Leendert; 20 di juli na Centro di Bario Dakota; 23 di juli na Parking lot di Paradijs Supermarket, Paradijs; 24 di juli na Bushiri Complex; 25 di juli na Scol Preparatorio Washington, Noord; y dia 26 di juli na Centro di Bario Noord. Esaki ta e aporte duna di parti di Ministerio di Cultura na e proyecto Bo Bario. Minister Michelle Hooyboer – Winklaar ta felicita tur muchanan cu a bay over y ta desea nan un dushi vakantie. Na e mesun momento ta invita tur muchanan hunto cu nan mayornan pa no keda sin participa na e proyecto aki y bishita nos ‘Arte Mobil’ na e otro barionan.