| Gobierno mester tuma un decision basa riba interes general |
 |
 |
| Thursday, 12 July 2012 14:07 |
 Den combersacion cu e Prome Mandatario riba e tema el a splica cu e situacion na Hulanda di un parke di Molina cu a pone un stop na dje ta hopi diferente cu Aruba. E Parkenan di Molina cu ta den discusion ta gigantesco di riba 100 megawatt. E discusion tabata pa laga e tuma e tumamento di decision na e provincianan mes caminda e parkenan lo mester a wordo construi. “E parke na Aruba ta chikito di apenas di 10 molina. Pesey ta lamentabel cu ta bruha un noticia cu otro. E parkenan di Molina na Hulanda ta sigui pero e decision ta wordo tuma door di e provincia, canando segun hinderverordening.” E mandatario a sigui comenta cu na Aruba tambe e ta pasa den un proceso di hinderverordening. Na momento cu WEB y e empresarionan di Vader Piet caba cu e contracto cu nan tin cu cera, nan mester bini Gobierno pa pidi un permiso di Hinderverordening . Esnan cu tin algo contra por entrega nan obhecion, cual lo wordo evalua door di e instancianan concerni, poniendo aserca tambe e MER-rapport. Si e keho tin base, e empresario mester haci cambio of si no tin base, e compania ta haya e permiso pa cuminsa traha. E Parke di Molina mester di un hinderverordening, y si hasta e compania haya e permiso y e ciudadanonan no ta contento, nan por bay Hues. Esaki ta nifica cu e proyecto tin diferente fase pa cana ainda. Gobierno di su banda, tin su punto di bista. Y esaki ta cu e Parke di Molina ta algo bon pa Aruba, ya cu e ta haci e isla menos dependiente di fuel oil y ta pone Aruba na nivel di 40% di energia alternativa cu ta algo hopi bon pa medio ambiente y tambe cu e prijs lo no sigui subi, ya cu e ora no ta depende asina hopi di petroleo. “Pa Aruba esaki ta algo hopi importante y grandi, y cu tur comprension pa e preocupacion di e ciudadanonan, nos ta cana e proceso aki cu interes di futuro di Aruba y comprension pa e preocupacion legitimo di ciudadanonan ... e ta un discusion conoci internacionalmente y ta un proceso delicado.” Premier Eman a enfatisa cu nan ta desea di lo por a hacie di otro manera pero esaki ta e alternativa di energia mas apropia pa Aruba. Despues ta bin solo, pero biento ta mas stabiel, mas consistente, na un prijs stabiel y mas limpi. Gobierno no ta kere cu e Parkenan di Molina ta un peliger pa salud. E ta wordo bisa tambe den e rapport MER, e zonido ta mininal. Tin ciudadano naturalmente lo prefera di no tin un Molina como nan bista y ta protesta. “Bo no por discuti riba un tema asina, pasobra e ta un tema di gusto y bo mester respete. Solamente como Gobierno tin cu wak e interes general, y wak con ta pisa e diferente responsabilidadnan. Si e no ta haci daño na salud di e personanan den vecindario y no ta haci zonido cu ta stroba calidad di bida pa e ciudadano, e ora nos ta bisa cu e proyecto por sigui, pero siguiendo e procesonan legal.” Pa loke ta e ciudadanonan di e prome Parke di Molina na Vader Piet cu no tabatin problema cune, e ta manda elogio pasobra e ta kere cu nan a pensa riba interes general di e pais. “Nan a duna hopi espacio pa un proyecto di molina por a bini sin a duna e kehonan di awe. Tur hende tin nan derecho pa duna nan opinion, pero nos tin cu wak interes mas amplio di e pais.” Di otro banda, siguiendo riba e tema pa wanta prijs di energia na un nivel acepta y uzando recursonan limpi, Prome Minister Eman a bisa cu ainda ta trahando riba e proyecto di gas. Cu GasUnie ta analisando kico ta miho, si e gas yega direct na WEB of na e refineria. Relaciona cu esaki tin dos tipo di oferta riba mesa: uno di LNG cu a traha riba dje hunto cu Valero y tin e oferta di Colombia pa gas comprimi. Na final di e luna aki lo haya mas detayes di esaki na Colombia. Ambos oferta ta atractivo cu ta haci e emision di carbon den aire menos, y ta haci produccion di energia, hunto cu e molinanan di biento, mas barata tambe.
Comentarionan (5)Mustra/Kita comentarionan ...
mi ta kere si sr eman ta papia di interes general awel cuminsa na pensa di frena nos debe nacional, pasobra si e parke di molina no ta bay juda pa baha gasto di coriente manera web mes a bisa si no pa un show cu ARUBA ta pensa green mi ta kere hinca e placa ey den un barco i un port na web mes caminda web mes ta hasi su transport i handlle e oil of un barco pa transport gas for di colombia ,caminda ta elimina hopi gasto di transport & handling fees to third parties
,
July 12, 2012
...
Na interes general di Baba CU su casa Herde ? lo ta ,no di pueblo mas debe lo ta .
,
July 13, 2012
Duna Comentario y/of Comparti riba Social Medi |
Mustra/Kita e formulario di comentario
