| Donny Rasmijn, Fraccion AVP: Estudio riba efectonan di Parke di molina Urirama ta contene informacion valioso pa habitantenan |
 |
 |
| Thursday, 12 July 2012 15:43 |
 Na e ultimo Green Energy Conference cu a tuma lugar aña pasa na october, gobierno di Aruba a divulga su plan pa bin cu un parke di molina di biento den localidad di Urirama pa genera mas coriente limpi cu no ta depende di e prijs di ‘fuel oil’ cu ta determina e afamado ‘brandstofclausule’.
Na november di e mesun aña, Presidente di Parlamento Paul Croes y Parlamentario Donny Rasmijn a bishita e localidad riba invitacion di e habitantenan preocupa cu e parke ta bin relativamente serca di nan cas. E habitantenan a mustra diferente peliger di salud cu nan lo por core en caso cu e projecto bin eynan y tambe nan ta preocupa riba e bunita bista cu nan ta gosa tur dia di dje cu lo wordo afecta. A base di e preocupacion aki e dos Parlamentarionan a entrega un lista di pregunta na Minister Benny Sevinger relevante e projecto. Durante di tratamento di presupuesto di aña 2012, Fraccion di AVP den Parlamento, a entrega un mocion unda cu ta urgi gobierno pa ehecuta un estudio di efectonan di e parke di molina teniendo na cuenta raportnan di Rijksinstituut voor Volksgezondheid en Milieu (RIVM): “Windturbines: invloed op de beleving en gezondheid van omwonenden”, “Evaluatie nieuwe normstelling windturbinegeluid” como tambe e “Handboek Risicozonering Windturbines” di SenterNovem. Tambe a urgi gobierno pa stipula un maneho den cual e ‘geluidsbelasting’ acceptabel pa vivienda – cual ta 40db pa Hulanda- wordo fiha den e normanan di seguridad pa cual instalacionnan di molina di biento cu ta genera coriente mester cumpli cu ne. E mocion aki a wordo aproba door di tur e 21 miembronan di Parlamento. Dialuna siman pasa Parlamento a ricibi un copia di e ultimo raport di efectonan social y medio ambiente cual ta contene e informacion cu a wordo pidi pa Parlamento. Fuera di esaki Parlamento a tene un encuentro cu e representantenan di e habitantenan serca di Urirama, Aruba Birdlife Conservation, WEB Aruba NV, Vader Piet Beheer N.V. cu ta e compania cu ta encarga cu e projecto di molina di biento y KEMA cual ta e organisacion cu a wordo contrata pa haci e estudio di e efectonan. Diferente puntonan importante a wordo treci dilanti dor di tur e representantenan. Vader Piet Beheer y KEMA tambe a organisa un encuentro publico pa asina presenta y splica e resultado di e estudionan na pueblo. E criticanan mas grandi cu a sali tabata cu a haya cu nan no a tene suficiente cuenta cu e sonido cu e molinanan ta genera cu por causa molester na e habitantenan cu ta biba banda di e molinanan y e distancia entre e molinanan cu Kapel di Alto Vista cu e probabilidad cu e sonido por stroba e creyente di resa. Den e raport di KEMA cu a keda publica recientemente a trata tur e puntonan cu Parlamento a pidi pa tene cuenta cune den e mocion cu Parlamento a aproba unanimanente. Tambe a atende cu e preocupacionan cu habitantenan a trece padilanti den e encuentro na Dr. Edward Cheung Centre for Innovation. Den e raport final di e efectonan cu ta contene informacion valioso riba e impacto social y di medio ambiente a haci diferente cambionan manera e distancia entre e molinanan y tambe unda nan ta specifica cu e sonido di e molinanan ta mas abou cu e normanan Hulandes, Danes y Europeo. Pues basa riba e estudionan haci e sonido lo no trece molester pa e habitantenan. Cu e estudionan haci, e interaccion entre e diferente stakeholdernan y cambionan treci den e proyecto no por nenga cu e mocion cu Parlamento a aproba unanimamente a keda ehecuta. “Parlamento a scrutina y lo sigui scrutina e proyecto aki pa sigura cu tur e aspectonan positivo cu ta wordo premira bay den balance cu e efectonan cu esaki por tin pa e habitantenan di Urirama y e bishitantenan di e Kapel di Alto Vista”, Rasmijn ta reitira. Pa esnan cu kier lesa e raport extenso aki por bay na e siguiente link: http://www.issuu.com/juanyrausquin/docs/seia_urirama_main_body
|
Mustra/Kita e formulario di comentario
