| Conoce Jayme Mata, atleta di Weganan Olimpico di Londres 2012 |
 |
 |
| Thursday, 12 July 2012 16:19 | ||||||
 Hopi lihe Jayme a cuminsa entrena dia y anochi pa e por a hisa su nivel di judo. Na 2001, Jayme a termina su VWO y a scohe pa sigui studia na Hulanda. Apenas algun siman bibando na Hulanda, el a wordo invita pa entrena cu e seleccion di Arnhem y Nijmegen como tambe Judo Top Tilburg. Asina Jayme a cuminsa combina su entrenamento di judo, dialuna na Arnhem, diamars, diaranzon y diahuebs na Nijmegen y diabierna hunto cu Javier Wanga na Tilburg. Na 2002 hunto cu Javier Wanga, Jayme a cuminsa competi den competencianan individual y ekipo. Na anja 2004, Jayme a conoce su mihor aña den e deporte di judo. E aña ey, Jayme a gana e International KAN Tournament, el a logra Plata na Tomoda international y Pot van Olen na Belgica. Na Londres, Inglatera e mesun aña ey, Jayme a logra conkista dos medaya di brons. Tambe hunto cu e ekipo di Nijmegen a logra e prome lugar den overgangsklasse. Den mayoria competencia, Jayme a termina den e mihor 7 bringadornan. Na 2005, Jayme a haya e prome invitacion di Aruba pa por competi bou di nomber di Aruba. Esaki ta prome biaha cu el a participa den e Pan American Championships cu a tuma luga na Puerto Rico. Den e campeonato Panamericano, Jayme a termina na un di shete lugar unda cu den eliminatorio, el a gana for di su contrincante di Paraguay pa despues perde contra Roberto Ibañez cu a representa Ecuador na Olimpiada di Beijing na 2008. Na 2006, Jayme a haya un otro oportunidad pa competi pa Aruba na e Weganan Centro Americano y del Caribe. Aki Jayme a sinti su mes den condicion top y riba un bon nivel di judo, pero lamentablemente, Jayme a lesiona su lomba. Un MRI scan a bin saca afor cu Jayme a sufri di un hernia na su nek, consecuentemente pa dos aña largo, Jayme no por a competi den judo. Asina mes el a sigui entrena su tecnica na Arnhem pa e no cai atras. Como un deportista y studiante ehemplar, Jayme a percura pa termina su Master opleiding na Universiteit di Utrecht y a cuminsa cu su carera profesional na KPMG. Den su entrevista cu KPMG, el a ripara cu KPMG tambe ta gusta cu Jayme ta un deportista. Aunke cu e trabou na KPMG ta exihi hopi, Jayme semper a purba pa entrena un minimo di 3 biaha pa siman den dojo y den weekend, e tabata core y haci fitness pa tene su mes den condicion. Na 2008, Jayme a haya e chens pa competi den su prome World Cup na Brazil y tambe keda pa e campo di entrenamento hunto cu Fiderd Vis, esaki pa cu Fiderd su preparacion pa e Weganan Olimpico di Beijing. Na Brazil e entrenamentonan a bai hopi bon y aki ta caminda Jayme a ripara cu el a cuminsa pick up e judo bon bek y asina el a dicidi di bolbe cuminsa entrena na Nijmegen pa por crece atrobe. Na 2011, Jayme a bolbe cuminsa competi den su peso bieu cu ta 66 kilo. Akinan el a logra gana tur su peleanan den e campeonato universitario y a logra sali di 4 luga cu su ekipo. Comienso di 2012, Jayme a haya un jamada di su coach, cu le a haya un invitacion personal pa competi den e Weganan Olimpico di 2012 na Londres. Esaki a haci'e hopi contento y a pone cu di biaha el a cuminsa regla tur cos pa cu su preparacion. Asina Jayme a logra entrena cu e competidor Jeroen Mooren cu lo representa Hulanda den 60 kilo na Londres. KPMG tambe ta hopi contento pa Jayme y a dune full cooperacion pa e por a planifica su trabou y entrenamento. Awor Jayme lo bai competi na e competencia di mas grandi den su bida. Nos a puntra Jayme con ta bayendo cu su preparacion pa cu e Weganan Olimpico di Londres 2012. 1. Con bo preparacionnan ta bayendo te cu awor aki? E preparacion ta bayendo hopi bon. Tur siman mi ta sinti progreso den mi deporte. Mi tecnica di judo mi a logra drecha hopi ultimo lunanan den training cu Jeroen Mooren cu lo representa hulanda den e categoria bou -60. Tur diadomingo cu nos tur dos ta na Hulanda nos ta spreek af pa train mainta tecnica y condicionamento. E training nan ki a pone cu mi condicion y tecnica a progresa hopi den ultimo lunanan. Awo cu mi ta entrenando na Barcelona tambe nos ta sigui cu e trainingnan aki. Fisicamente tambe mi ta hopi bon para, mi ta sinti cu awo mi ta den e miho balansa cu nunca entre mi peso y mi forsa fisico. Antes mi tabata mester a baha mucho hopi peso na ultimo momento of e otro caso ta cu mi tabata semper bon di peso pero mucho flaco pa mi categoria di 66 kilo y awo cu mi ta mas bieuw en bes e bira mas dificil, mi ta juist den un bon balansa di forsa y peso. Mi ta train sin problema cu judokanan di mi peso y e ultimo campeonatonan tambe mi a ripara cu mi no tin e problema mas cu antes mi tabata tin, esta cu fisicamente mi contrincantenan tabata superior. Durante e campeonato nan di fogeo mi a haya hopi bon guia di mi coach Betto Thiel. Nos a sinta analisa hopi riba peleanan y kiko ta e punto nan cu mi lo mester bai traha riba dje ora cu mi jega bek hulanda pa train. E puntonan aki a yudami hopi, pa mi por tin un focus ora di train. Y un persona cu sigur sin falta ta yudando mi masha hopi mes den mi preparacion ta Javier Wanga. Mi ta train tur siman cu Javier. Javier ta un hopi bon sparring partner y bon coach. Javier a judami hopi pa mi amplia mi tecnica y con ta e miho manera pa mi use. Javier a compañami na hopi competencia den Hulanda mes y e conoce mi manera di judo, loke cu ta haci mas facil pa e dunami bon conseho. Mane mi a menciona prome, e siman aki nos ta train na Barcelona hunto cu henter e ekipo di hulanda tambe. Esaki ta bira e ultimo stop prome cu London. Despues di esaki nos lo finalisa e trayecto cu trainingnan na Hulanda mes. 2. Kiko e lo ta pa Bo persona ser un representante di Aruba na Weganan Olimpico? Pa mi e ta un soño pa competi den Weganan Olimpico. Y mi ta hopi orguyoso cu mi por haci esaki representando nos isla chikito Aruba. Tur ora cu Hulanda ta papia di nan seleccion, nan ta bisa pa ta un pais asina chikito compara cu Merca, Brazil, Alemania etc. nan ta haci hopi bon. Pesey den tur cos cu mi haci cu mi por pone Aruba riba mapa, mi ta zorg pa tur hende sa cu mi ta bin di Aruba y mi ta representa mi pais chikito cu hopi orguyo. No solamente den mi deporte, pero tambe den Academia ora cu un cas di publicidad kier a publica mi scriptie bou di nomber di un escritor Hulandes, mi a percura pa e ta duidelijk cu ta un escritor Arubano mi ta. Den mi trabou actualmente mi tin contacto cu hopi compania internacional, tambe tur ora mi ta papia cu nan di mi pais Aruba. Y na Hulanda mes den mi trabou mi tin un bon nomber aki na KPMG y mi ta kere mi a pone un bon nomber pa Aruba na e oficina aki. Y pa nos bai bek na e deporte di judo. Semper tur campeonato cu Javier y mi persona a competi aki na Hulanda of den exterior, ora cu nos a biaha cu ekipo hulandes nos a percura pa nos bai cu trainingspak y t-shirt di Aruba cu nos mes tabata laga print akinan. Tambe nos a haya sponsor varios biaha di Sr Danny Verlaan (Gerente di Spare Time). Danny semper a yuda nos cu panja cu print di Aruba pa nos promove Aruba ora cu nos ta den exterior. Awo tambe Aruba su nomber ta riba website di un di e supplier nan di ekipo di Martial Arts grandi den Hulanda, Belgie y Luxemburg. E compania aki a bai di acuerdo pa sponsor mi persona y Javier cu materiaal pa preparacion pa Weganan Olimpico y a bai di acuerdo pa publica esaki como un sponsor di Team Aruba. Mi ta haya hopi great tur biaha cu mi por pone Aruba su nomber positivamente den spotlight. Y mi ta hopi orguyoso di semper a representa Aruba den tur cos cu mi haci. Asina Fiderd Vis, Javier Wanga y mi persona a representa Aruba na e Campeonato Mundial na Rotterdam. Unda cu nos mes a haci tur esfuerzo pa yega na competi y tambe pa percura cu Aruba ta bon representa. Esaki ta un ehempel unda cu sin tin apoyo di Aruba mes nos toch ta zorg pa pone Aruba su nomber ariba. Na e campeonato aki nos a haya hopi reconocimento cu nos a bin asina hopi hende di media hulandes y di corsow a aserca nos pa entrevista y a saca hopi portret pa publica. 3. Kiko Aruba por spera di Jayme Mata den e Weganan Olimpico di Londres 2012? Aruba por spera cu mi lo haci mi uiterste best pa mi duna mi miho performance riba 29 di juli y pone Aruba si nomber den un bon spotlight. Un biaha mas mustra cu chikito cu Aruba ta nos ta jega y por competi na e nivel mas halto cu e paisnan grandi. Awo caba mi tin un grupo grandi di Hulanda cu ta hopi enthousiasma pa wak mi competi y ta para tras di Aruba tambe riba e dia aki. Fin di dia, Aruba y mi mes por wak bek y ta orguyoso y satisfecho.
Comentarionan (3)Mustra/Kita comentarionan ...
Mi ta hopi orgulloso ku Jayme lo ta participando den weganan Olympico y mi tin high expectations di dje aunke lo ta E competentia di nivel mas halto. Mi a practica Judo pa mas ku 18 anja y awo mi tin alrededor di 8 anja sin practica Judo pero mi ta kere Jayme a kaba di inspirami y dunami e gana di subi mat bek despues di 8 anja. Fiderd, Jayme, Javier y Beto mi tin mal noticia pa boso paso Gandola tey bek!! HHAHAHAHAHAHAHA.....Jayme exito y unico kos bo por hasi ta hasi bo best y laga tur tur kos riba mat!!!! Osa bo longtime friend Guido Carlo
,
July 13, 2012
Duna Comentario y/of Comparti riba Social Medi |
Mustra/Kita e formulario di comentario
