| Team BoBario cu Programa Vacacional na Pos Chikito |
 |
 |
| Thursday, 12 July 2012 19:21 |
|
Team BoBario ta den pleno accion pa ehecuta e plan vacacional cu ta pasa den diferente bario. Diabierna ta toca turno na Pos Chikito, despues cu den e siman aki a bay San Nicolas y Brazil caba. E Programa Vacacional ta encera diferente evento, pero uno cu sigur ta hala atencion di e muchanan ta e competencia di Pannabol. Na Pos Chikito ta instala un veld special pa Pannabol pazuid di e veld di futbol di Universal. Tambe Team BoBario ta percura pa pone un tent grandi riba veld di Universal na unda tur otro actividad ta tuma lugar durante dia. For di tempran caba muchanan por presenta y inscribi pa participa. Mayornan ta wordo pidi pa trece nan yiunan pa pasa algun ora disfrutando sanamente. Na e sitio mas informacion ta wordo duna di tur e otro eventonan cu ta tuma lugar. LIMPIESA Na mesun momento habitantenan di Pos Chikito, Sabana Basora y bisindario ta wordo pidi pa bin duna un man cu limpiesa di e veld di bala di Universal. Tin un grupo di persona hunto cu Parlamentario Desiree Croes, kende a tuma e iniciativa pa mehora e area aki pa hoben y adultonan di e bisindario por haci deporte. Sinembargo pa logra esaki, mester di ayudo di hopi hende, pasobra hopi man ta haci hopi trabou. Presenta na veld di Pos Chikito den oranan tempran di mainta y bo haya mas informacion di e plannan cu tin pa reactiva e club di Universal. |
Mustra/Kita e formulario di comentario
