| John Moorehead: Formacion Social a siñ'e pa ta un parti productivo di sociedad |
 |
 |
| Thursday, 12 July 2012 19:48 |
|
John Moorehead no por a sconde riba su cara e satisfaccion y el a confesa cu “Esaki a yuda Lucas tremendamente. E tabatin mester di un poco enfoke y e proyecto Formacion Social a dun'e disciplina.” Apesar di distancia, e ta mantene un contacto estrecho cu su yiu. “El a conta mi riba e diferente experiencianan, specialmente e campamento y e ehercicio cu obstaculo. Pero mas tanto riba e cosnan cu el a siña, e lesnan di norma y balor y con pa e ta un parti productivo di sociedad,” e tata a bisa. E Proyecto Formacion Social ta un cooperacion entre Gabinete Mike Eman, Ministerio di Defensa y Ministerio di Asuntonan Interior di Hulanda. E ta wordo ehecuta den su prome fase na Marinierskazerne Savaneta bou guia di Capitan Cedric Werleman y ta conta tambe cu cooperacion di otro departamento, manera Enseñanza pa Empleo y companianan priva di Aruba. “Ami lo recomende enormemente. E tabata manera un regalo di shelo pa Lucas y mi tin entendi cu tur otro hoben cu a termin'e, tambe a beneficia hopi di dje,” Sr. Moorehead a conta momentonan despues cu e ceremonia di graduacion caminda Prome Minister Mike Eman a haci entrega di baret y certificadonan na cada graduado, a finalisa riba tereno di Marinierskazerne na Savaneta. Moorehead Sr. mescos tur e otro mayor presente, cu camara y celular den man, a capta e momento di orguyo. “E ta hopi emocional... Pa wak hende traha asina duro y mi ta kere cu esey ta loke tur e hobennan aki a haci, pa asina yega caminda nan a yega, cu nan tin un logro. Awor nan tin nan baret y certificadonan, y tambe e colegialidad,” el a expresa. Otro aspecto cu a hala hopi atencion di e meneer aki tabata e envolvimento y sosten di gobierno pa cu e proyecto. El a bisa di a keda impresiona cu e compromiso den presencia di Prome Minister y otro oficialnan halto di Gobierno na e ceremonia. “Mi ta kere cu sin duda algun e proyecto aki mester sigui. Awo nan ta bay cuminsa cu e di dos fase cu ta mustra di ta hopi bentahoso tambe”. Adicionalmente el a comparti cu “lo ta interesante pa wak e storianan di exito despues cu e programa caba y cu esey riba su mes lo apoya e programa den futuro.” Su yiu homber, Lucas, awor ta pasa pa e di dos fase caminda e ta bay scoge un estudio na Enseñansa pa Empleo y un periodo di stage na Aruba mes. Inscripcion pa e proximo trayecto di Formacion Social ta na Januari 2013. Comentarionan (2)Mustra/Kita comentarionan ...
Awo mi a tende di e proyecto aki y di berdad mi ta impresiona. Esaki ta un hopi bon idea pa saca e muchanan for di caya... Wak e meneer aki, cu no ta biba na Aruba, dus obviamente e ta neutraal y e por mira e beneficionan di e programa y di loke Gobierno ta haciendo na Aruba.
,
July 13, 2012
...
Hopi bon. Hopi bn cu e hobennan aki cu tin biaha mester di un poco di empuhe, ta haya esaki por medio di e tipo di programanan aki cu Gabinete Eman a trece. Hopi biaha den hubentud e muchanan mester di un guia y empuhe pa yuda nan scoge e direccion cu nan kier bay. Mi ta orguyoso cu Aruba tin un programa asina.
,
July 13, 2012
Duna Comentario y/of Comparti riba Social Medi |
Mustra/Kita e formulario di comentario
