|
Studiantenan di Aruba ta haci paseo den Leiden cu Prome Minister Mike Eman |
 |
 |
|
Sunday, 15 July 2012 17:24 |
|
Den e poco oranan liber cu Prome Minister Mike Eman tin e ta cana hunto cu su señora Doina riba e Linear park na Aruba. Por lo menos un bes pa siman nan ta haci un paseo energico. Eman no kier a pone un banda e bon custumber ey awor cu e ta pa trabou na Hulanda.
Ta pesey cu el a invita studiantenan di Aruba pa compañe hunto cu Doina riba su diadomingo “liber” pa haci un paseo den e centro historico di Leiden. E respons tabata grandi, studiantenan a reacciona entusiasma. Na cuminsamento tabata parce cu e tempo lo a daña cos, pasobra cu awacero tabata basha. Pero ora tur hende a yega na e punto na unda ta topa otro, esta Centraal Station di Leiden, e solo a sali pa keda briya durante e resto di dia. E grupo di mas o menos 40 persona cu Prome Minister Eman canando dilanti a hala basta atencion cu nan T-shirt bisti di 'I love Aruba”. Un señora di un poco edad den forma espontaneo a bisa nan cu el a yega di bay vakantie Aruba y cu e ta hay’e un isla fantastico. E ruta a pasa entre otro dilanti café 't Keizertje di cua Henny Eman un tempo tabata doño. Un inscripcion den un piedra di e cafe aki ta recorda e tempo ey cu un teksto remarcabel. Pasando dilanti e estatua di alcalde Van der Werff, kende durante e conkista di Leiden dor di e Spañonan na 1574 a ofrece e habitantenan pa com’e pa kita nan hamber y dilanti e ‘Burcht’ halto, e grupo a yega na e Museo Volkenkunde, partner di colaboracion di Museo Arquelogico na Oranjestad. Despues di e paro educativo aki Prome Minister Eman a invita e studiantenan pa bebe y come algo cu ne y sigui discuti riba topiconan di nan interes.
 |
Mustra/Kita e formulario di comentario
