Flora de Bie di Maris Stella na apertura di “aanleunwoningnan”: Nos sa cu Michelle tin un bon curason pa nos grandinan

Tuesday, 17 July 2012 20:22

Sra. Flora de Bie ta e manager di Maris Stella y durante e inauguracion di e proyecto di casnan pa nos grandi nan el a expresa palabranan di gratitud dirigi na Minister Michelle Hooyboer Winklaar. Sra. de Bie a bisa cu hopi biaha e mandatario a acerca nan y a haci nan hopi contento.

“Nos sa cu Michelle tin un bon curason pa nos grandi nan. E tin un sentimento pa e cuido adecuado y esaki ta algo cu mester ta bon pa nan”, el a expresa. A splica cu e tin 21 aña trahando na Maris Stella y e tabata presente ora cu a pone e prome piedra. E sa precies kico a tuma luga y ken a haci’e. Pero a tuma hopi aña pa e proyecto por a wordo realisa manera mester ta. “Awor e momento a yega cu e proyecto ta manera mester ta”, a expresa. Na Aruba tin un grupo di hende cu mester di un opvang cu no ta asina rigido. E grandi nan mester por tin nan cuido, pero tambe nan mester por biba nan bida sin laga un banda e parti di ayudo, a señala. Tin hopi hende grandi cu socialmente ta nan so y cu mester di un tiki compania, diberticion, actividad, entre otro. Maris Stella ta duna tambe e servicio ey caminda e grandi nan por comparti cu otro diferente actividad. E intencion tabata pa e casnan aki pa nos grandi nan bira habitabel, pero awor a yega asina leu cu esey ta posibel. Esaki a bira un concepto nobo na Aruba ya cu no tin esaki ningun otro caminda. E grandi nan ta drenta Maris Stella pero nan mester sa cu tog nan tin nan cas. Tin cu duna nan hopi informacion relaciona cu e hecho cu e habitantenan di e casnan por biba nan bida priva den nan cas y Maris Stella ta yuda cu por ehempel cushina, labamento di paña, etc. Tin hende cu mester di hopi ayudo y otronan cu no hopi. Segun Sra. de Bie esaki ta un proceso cu ta tuma su tempo ya cu mester di hopi splicacion sin embargo ta algo hopi interesante y hopi bon. E habitantenan ta bira hopi contento den nan cas. Nan ta proteha y nan ta sinti cu ora nan tin un problema nan tin ayudo mes ora, a bisa. Hunto cu e habitante di e cas ta palabra kico por haci pe. A agrega cu nan ta hopi contento cu e proyecto aki ya cu ta algo cu Aruba mester di dje. Ta un situacion cu ta crece y cu e grandi nan mester di dje. Awor pa dilanti Maris Stella ta bay funciona como un Service Center, a indica. “Nos ta hopi contento cu esaki a cuminsa lora y mi ta spera cu nos ta bay yena tur e casitanan cu hende cu mester di dje. Mi ta spera tambe cu Michelle ta bolbe bek pa check con cos ta lora”, el a expresa. Minister Michele Hooyboer-Winklaar a inaugura e proyecto cortando e cinta hunto cu Sr. Dominico Hoek y Sr. Jani Coffie cu ta habitantenan di un di e casnan aki.