| Exposicion ‘Macho Afectivo’ di Fundacion Respeta Mi |
 |
 |
| Wednesday, 18 July 2012 15:50 | |||
 Fundacion Respeta Mi ta hopi contento cu e cooperacion di Post Aruba pa ofrece su edificio pa tene e exposicion ‘Macho Afectivo’ durante e periodo di tarifanan special pa paketa pa studiante, pa asina un publico grandi por mira e exposicion aki. E fundacion ta gradici Post Aruba pa sostene proyecto social pa nos comunidad. Fundacion Respeta Mi ta contribuyendo pa 20 aña caba na prevencion di abuso di mucha na Aruba. Tin cuatro forma: abuso fisico, abuso emocional, incluyendo violencia domestico, abuso sexual y negligencia. Abuso di mucha ta conduci na daño. Cu su campaña ‘E rol di hende homber den prevencion di abuso di mucha’ Fundacion Respeta Mi a señala e conflictonan cerca e hende homber den su rolnan den comunidad, manera e rol di pareha, tata, colega y amigo. Di un banda e mester ta un homber macho y fuerte, pero na otro banda ta spera tambe cu e ta un homber cariñoso y sentimental. Crea un balans den esaki ta importante ora di lanta/educa mucha y pa preveni abuso di mucha. E fundacion a sigui e biaha aki cu un concurso di potret ‘Macho Afectivo’. Cu e concurso aki kier enfatisa e impacto di e homber como role model positivo den bida di mucha. E exposicion ‘Macho Afectivo’ ta consisti di 15 potret di ganador y finalista di e concurso di potret. Tur 162 potret di e concurso aki ta riba Facebook di Fundacion Respeta Mi. Señor Wever, e macho afectivo riba e potret ‘Mi ta cu bo te na final’, ganado absoluto di e concurso, a habri e exposicion hunto cu su dos yiu muhe. E potretnan ta demonstra claramente cu nos muchanan na Aruba sigur tin hende homber positivo, responsabel y afectivo den nan bida.
|
Mustra/Kita e formulario di comentario
