Minister Dr. Richard Visser: E hobennan aki ta haci nos sinti orguyoso di ta Arubiano

Wednesday, 18 July 2012 18:44

Diamars merdia Minister di Salubridad Publico y Deporte, dr. Richard Visser a ricibi e team campeon di Aruba cu a gana e titulo maximo den Junior League Baseball Latino Americano na Costa Rica y ta bay representa paisnan Latino Americano na e World Series cu ta tumando luga proximamente na Michigan, na Merca.

Minister Visser tabata sumamente orguyoso di a ricibi e hobennan na aeropuerto, pa despues sigui den limousine den un caravana di triunfo pa Paseo Herencia. Na e centro di compra na Palm Beach nan a wordo honra cu un recepcion di bon bini, organisa pa representantenan di Paseo Herencia.

E hobennan a wordo ricibi pa un multitud inmenso di fanatico, incluyendo nan mayornan, dirigentenan di e deporte di beisbol, Parlamentarionan y Ministernan. Tabata un momento hopi emocionante pa e muchanan cu a traha asina duro pa yega nan prome meta, pues di gana e torneo Latino Americano.

E triunfo di nos hobennan beisbolista na Costa Rica ta "yena nos pais cu orguyo y ta haci nos orguyoso di ta Arubiano," Minister dr. Richard Visser a enfatisa.

Minister Visser tabatin palabranan di elogio so pa e hobennan, nan mayornan, pero tambe hopi remarca positivo tocante nan manager, coachnan y tur otro miembro di e team tecnico, ken a "haci un fabuloso trabao".

E titular di deporte a bisa cu ya tin team disponibel pa yuda guia y prepara e hobennan pa e siguiente reto, cual ta e World Series na Michigan. El a subraya cu naturalmente mester celebra e triunfo aki, cu ta algo grandi, pero el a pidi e campeonnan pa no perde nan enfoke, pasobra nan mester tuma e mesun pasion y candela cu a conduci nan e trofeo aki y uz'e pa nan encuentronan na e World Series.

Minister Visser a expresa cu hobennan di Aruba ta haciendo un tremendo trabao den e area di deporte, incluyendo e ultimo titulonan cu a wordo gana tambe pa nos ajedristanan, futbolistanan y den bowling, entre otro. E mandatario a bisa cu e restructuracion di deporte na Aruba ta dunando bon resultado, pasobra organisacionnan fuerte ta produci atleta. E restructuracion ta ofrece awo e facilidad cu nuebe comision, incluyendo e comision di subsidio, ta trahando hunto pa asisti deportistanan den diferente ramo y tambe cu e federacionnan ta trahando ariba un nivel mas halto.