Hulanda a priminti Aruba di lo duna su completo cooperacion den studia e posibilidadnan pa pasaheronan cu ta biaha pa Europa por wordo ‘gecleard’ na aeropuerto Reina Beatrix caba. Prome cu el a aborda avion rumbo pa Aruba Prome Minister Mike Eman a firma un declaracion di principio cu director-general Harke Heide, reemplasando Minister Gert Leers di Inmigracion, Integracion y Asiel, kende ta cu vakantie. A keda acorda cu un grupo di trabou consistiendo di hende di Aruba y Hulanda, ta bay haci e estudionan.

E servicio di pre-inspection y preclearance cu Aruba tin pa hopi tempo caba cu autoridadnan Mericano y cu ta wordo ofreci pasaheronan cu ta biaha pa Merca, ta sirbi como ehempel. Den e declaracion di principio a wordo poni e posibilidadnan cu e posicion strategico di Aruba pa loke ta America Central y Latino America ta ofrece pa stimula e trafico aereo entre Europa y e ‘Americanan’. Den e documento e deseo ta wordo treci dilanti pa stimula ‘un bon fluho di hende y di e productonan cu nan ta trece cu nan’. Eman a mustra di ta masha entusiasma di e rapidez cu e declaracion di principio a keda cla. “E grupo di trabou por cuminsa traha masha lihe mes. Preclearance ta nifica cu pasaheronan cu ta biaha di Aruba pa Europa y vice versa ya na Aruba caba ta drenta of sali di e teritorio Schengen”.

Cu esaki e frontera entre Europa y e Americanan pa pasahero aereo ta bay ta na Aruba. Esey ta haci e biahamento entre ambos continente mas facil, manera ta e caso actualmente entre Aruba y Merca. Un facilidad asina ta haci e isla hopi mas atractivo ainda como ‘gateway’. Prome Minister Eman ta realisa cu un preclearance pa Europa no ta algo cu ta keda regla di awe pa mañan. Tur 27 pais cu ta forma parti di e teritorio Schengen mester bay di acuerdo cu e adaptacionnan den e tratado actual. Un di e prome instruccionnan cu e grupo di trabou ta haya ta pa investiga e aspectonan huridico. “Pero, e prome paso por wordo haci hopi lihe. Un oferta a wordo haci na nos awe pa haci un test cu e instalacion di un sistema automatisa di entrada na aeropuerto Reina Beatrix”, asina Eman a splica. Pa esnan cu tin un paspoort Europeo cu un chip, e procedura di inmigracion ta cana mas lihe. Schiphol ta introduci e sistema aki na september , despues di un proyecto piloto exitoso. Consehero di Coordinacion specialisa K.J. Gerritsen di Ministerio di Asuntonan Interior y Relacionnan di Reino a bisa e delegacion di Aruba cu e ‘portanan cu ta lesa paspoort’ e aña aki ainda por wordo instala, si esaki ta wordo desea. E lo kier haci un test na Aruba pa mira si e sistema ta aplicabel tambe pa esnan cu tin un paspoort Mericano. Na e reunion aki senior officer Marten Dijkstra di Strategic Unit tabata presente di parti di aeropuerto Schiphol. “Nos ta hopi di acuerdo pa Aruba haya e facilidadnan di preclearance pa Europa. Aeropuertonan y companianan di aviacion tin gran interes pa tin un fluho lihe di pasaheronan. Ta pesey mes cu nos ta sostene grandemente e deseo di Aruba den esaki”.

Finalmente Prome Minister Eman a bisa “Esaki no ta solamente un bon desaroyo pa nos economia, pero ta ofrece nos ciudadanonan bentahanan grandi. Biahamento pa Europa pa sea pasa vakantie, pa bishita di famia of pa negoshi ta bira asina un poco mas facil”. E acuerdo cu a yega na dje na aeropuerto Schiphol pa institui un grupo di trabou conhunto por wordo mira como cu consecuencia concreto di e protocol di cooperacion cu Prome Minister Eman a firma cu ex Minister Piet Hein Donner riba 27 di october 2011 na Oranjestad. E protocol aki ta encera hopi mas tereno di maneho.

Comentarionan (2)

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi