| Minister Hooyboer-Winklaar ta percura pa cooperacion y apoyo financiero sumamente necesario pa e servicio nobo di "Tienermoeder Consulent" |
 |
 |
| Wednesday, 18 July 2012 19:15 |
 "Embaraso Hubenil ta keda un realidad cu nos ta enfrenta tur dia," Minister Michelle Hooyboer-Winklaar a bisa, splicando cu pa medio di e cartera Sociale Zaken, a provee Wit Gele Kruis cu e fondonan necesario pa cuminsa desde juni cu e departamento "Tienermoeder Consulent".E situacion di embaraso hubenil tin dos aspecto, e mandatario encarga cu asuntonan economico, asuntonan social y cultura a bisa. Na un banda tin e aspecto di prevencion, unda cu e proceso di bay den scolnan y duna informacion na nos hobennan tocante prevencion di embaraso hubenil. Esaki a duna bon resultado, como tambe e diferente exponan cu a wordo organisa den e barionan. Durante e lecturanan di Wit Gele Kruis na scolnan informacion ta wordo duna tocante entre otro malesanan transmiti sexualmente y efectonan ariba e baby ora cu e mama ta sali na estado durante cu e mama y/of tata ta bao influencia di droga y/of alcohol. Na otro banda tin e aspecto di preveni cu e mama hoben ta sali na estado atrobe, durante cu tambe e ta ricibi guia necesario con pa cuida su baby y caba su scol. E risico ta keda halto pa un mama hoben bolbe sali na estado mas biaha si no tin un intervencion grandi, Minister Michelle Hooyboer-Winklaar a enfatisa, gradiciendo Wit Gele Kruis pa nan esfuersonan continuo pa cu e prevencion di embaraso hubenil, como tambe e guia special na "tienermoeders". Director di Wit Gele Kruis, sr. Gino Goeloe a expresa den un conferencia di prensa hunto cu Minister Hooyboer-Winklaar cu e servicio nobo aki ya tabata existi en realidad. El a cuminsa cu e proyecto "stevig ouderschap" cual a wordo funda pa Cede Aruba y despues cu a identifica e problemanan y a interpreta e cifranan, a bira tempo pa bin cu un proyecto miho dirigi na e situacion actual. Sr. Goeloe a anuncia cu sra. Monique Giel Labad ta na encargo di servicio aki, unda cu e ta expandiendo su actividadnan ariba e tereno di prevencion di embaraso hubenil y guia mas activo di "tienermoeders". "Bida ta sigui," sr. Goeloe a comenta, añadiendo cu e hoben mester guia despues cu e haya su yiu, no solamente den e cuido y trato di su baby, pero tambe con pa sigui p'adilanti, bay bek scol, busca un trabao, bira independiente, etc. Den esaki, Wit Gele Kruis lo ta intermediando na scolnan tambe pa yuda e mamanan hoben caba nan scol, entre otro. Tienermoeder Consulents, sra. Monique Giel Labad, como tambe sr. Goeloe a gradici Minister Hooyboer-Winklaar pa su confiansa den Wit Gele Kruis y e fondonan pa por realisa e servicionan importante aki. El a splica cu for di juni e ta trahando ariba entre otro e proyecto pa scolnan permiti e mamanan hoben caba nan scol y e reunionnan ta bayendo den bon caminda. Tambe, sra. Giel Labad a conta cu e ta bezig cu tur diferente instancia cu ta yuda e "tienermoeder" y su famia sigui p'adilanti for di e momento cu a mucha muhe sali na estado, pero specialmente ora cu e baby nace. Tin un proyecto piloto cu sra. Giel Labad ta trahando ariba pa un aña caba di un caso di un mama, unda e mama ta wordo guia con pa por sigui funciona independiente. Esaki ta e proyecto piloto pa e proyecto di 2 aña cu ta bay cuminsa awo na un escala mas grandi, unda cu Wit Gele Kruis ta traha cu e mama, siñ'e con pa cuida su baby y hunto cu organisacionnan concerni ta provee guia social emocional, enseñansa y encurash'e asina traha pa su futuro y futuro di su baby pa nan por funciona bon den nos comunidad. Den e parti aki tambe lo brinda guia na e mayornan di e mama hoben, cu lo sigui guia nan yiu na cas. |
Mustra/Kita e formulario di comentario
