Mike Eman: DJ Chuckie ta haci Aruba su di dos cas

Wednesday, 18 July 2012 20:04

Den medionan di comunicacion na Hulanda a sali publica , hasta riba front page, e idea y intencion cu a keda anuncia entre DJ Chuckie hunto cu Gobierno di Aruba, pa loke ta trata e establecimento di un studio di grabacion.

Segun prome minister di Aruba, mr. Mike Eman, en berdad e hoben aki, kende ta un DJ hopi popular cu un cantidad grandi di siguido, a scoge Aruba como centro di actividad importante den futuro, pa haci grabacionnan cu artistanan internacional rond mundo y hacie na Aruba. Algun luna pasa el a cuminsa cu su residencia na Aruba. Esey naturalmente ya caba tabata hala hopi atencion den medionan di comunicacion. E prome mandatario ta sigui splica cu e DJ a celebra su cumpleaños na Aruba y e ta un persona cu a haya un afecto hopi special. Durante di algun siman pasa tabata tin contacto cune riba e interesa aki. Durante bishita na Hulanda a sigui hiba e convocacionnan y finalmente el a invita prome minister pa ta parti di un conferencia di prensa caminda cu el a duna e informacion cu e kier habri un studio di grabacion internacional na Aruba y su interes ta pa hacie cu un marca renombra y e kier haci esaki tambe pa crea un centro di grabacion na Aruba caminda artistanan internacional ta bin. Logicamente esey ta formanan con Aruba por keda resalta y pesey tambe gobierno a duna apoyo na e publicacion aki y lo ta biniendo Aruba dentro di algun dia y lo sinta cune pa mira con gobierno por facilite naturalmente den e proceso aki pa asina e establecimento aki por wordo realisa, segun prome Minister Eman. Den diferente medio di comunicacion a haci un cobertura amplio riba e tema aki. A haya un amigo extra den e mundo farandulero cu ta haci Aruba nan cas y a mira esaki tambe cu hopi di e futbolistanan, pareu cu weganan grandi caba, nan ta bin directamente pa Aruba y ta haci gobierno contento. Esey kiermen cu e hospitalidad di nos hendenan, e partinan cu ta haci asina atractivo n Aruba ta haci cu e personanan aki ta scoge Aruba como nan segundo cas.