|
Na aña 1953 na Aruba no tabata tin television y mucha homber y muchamuhernan tabata bai scolnan separa. Baymento di misa, cine y weganan di futbol tabata e actividadnan mas importante di siman.
Den e tempo ey talento musical, e curiosidad cultural, e amor pa mucha y e curashi pa haci cosnan nobo, a pone un educador Hulandes, lanta un grupo di canto di mucha homber, cu a haña e nomber di "DE TRUPIALEN". E homber aki tabata Frere Alexius. Pa ser exacto "De Trupialen" a ser funda dia 13 di Januari 1953, pues e grupo aki ta bai cumpli 60 aña. Entre su amigonan cu a curashe for di un principio, tin Frere Antonius, Frere Franciscus, Frere Eduardo, Frere Caspar, Frere Paulino y otro frerenan. Tambe tin Padu Lampe, Hubert Booi, y Rufo Wever. Despues cu Frere Alexius a experimenta un poco tempo, poco poco e grupo a bin discubri nan mes un direccion, esta un grupo cultural cual ta dedica nan mes na preserva y na mes un momento, promove y divulga e cultura Arubano. E prome idea tabata pa e grupo canta misa hunto cu e koor di Frerenan, pero e acogida tabata asina grandi cu poco tempo despues a cuminsa pidi e grupo pa canta na otro ceremonianan oficial. De Trupialen a dicidi di haci otro avtividadnan. A cuminsa siña e muchanan toca instrumentonan musical y tambe hunga comedia. Poco tempo despues e coro tabata tin su propio banda musical"LOS ELEGANTES" Tambe e muchanan a siña actuacion. Y Poppenkast, cu te awe ta activo y cu a bira masha famoso tanto pa mucha como hende grandi. E canto di e grupo a hala masha atencion....pero tambe masha discusion, pasobra Frere Alexius a tribi, den e añanan cincuenta di canta canticanan na Papiamento den tempo cu hulandes tabata e idioma cu tabata domina. E prome biaha cu Frere a canta canticanan na Papiamento den publico tabata na ocasion di Aña di La Reina. Frere a haña masha critica mes, pero tambe hopi elogio.Frere su conviccion. UN PUEBLO MESTER PAPIA Y CANTA DEN SU PROPIO IDIOMA PA E POR DESAROYA SU MES, a pone sigui canta na Papiamento. E prome disco cu "De Trupialen" a graba tabata un composicion di Rufo Wever y Padu lampe un wals, Aruba dushi tera' cu awe ta nos Himno Nacional. De Trupialen tabata consisti di mucha hombernan so. Ta despues na fin di añanan cincuenta tabata tin mucha muhernan tambe, pero e pensamento di un grupo mixto a haci cu Obispo a dicidi cu esey no tabata por.
Ta te den añanan sesenta a bolbe permiti mucha muhernan drenta den e grupo atrobe. Den e 60 aña cu De Trupialen ta existi, hopi curason, den tur skina na Aruba, nan a haci contento cu nan canto, comedia, musica y tambe poppenkast. Pasando den tur bario aki na Aruba De Trupialen tabata trece alegria, hopi biaha ariba terenonan di scol of bao di "overdekte speelplaats". Mester menciona cu nunca e lidernan di De Trupialen a purba di para e actividadnan progresivo di nos hubentud. Al contrario nan tabata bai cu tempo y moda pero poniendo semper nos cultura, nos normanan y balornan na prome lugar. Tambe nos mester menciona cu gruponan di gaita, combo, sinfonia di boca a haci nan entrada den club. Pa duna e gruponan mas responsabilidad Frere tabata kier pa nan a forma nan mes un directiva. Na final di añanan sesenta e songfestivalnan a cuminsa bin hopi na moda y De Trupialen no kier a keda atras. Tur e gruponan tabata organisa nan mes un Festival di Canto. Carnaval tambe tabata ser celebra cu gran entusiasmo den club. Hasta a compone nan mes un cantica di carnaval. Despues cu Frere Alexius a cuminsa hala un tiki atras pa laga e miembronan mes dirigi De Trupialen, Sr. Edgard Boekhoudt a encarga su mes cu e trabaonan den club. Tambe Sr. Bill Tromp a cuminsa cu un grupo di poppenkast y comedia pa asina tene De Trupialen na bida. Na 1991 a habri e posibilidad pa genera miembro nobo y pa ser exacto 27 di September, Lem Pieters y Mario Tromp a cuminsa atrobe cu lesnan di canto y asina a reactiva e grupo musical. Foi aña 1993 te cu 2003 De Trupialen tabata bao liderazgo di Sr. Jossy Tromp y di 2004 te cu dia di awe Sr. Nico Luydens ta President di De Trupialen. Pa e muchanan cu a lanta den De Trupialen e no tabata solamente un coro of banda musical, e tabata un centro di recreacion, un luga pa bo topa cu bo amigonan, un luga pa siña cosnan cu bo no por a siña otro caminda. Hopi a siña dirigi reunionan, siña tuma desicionnan na un manera ordena y responsabel. Siña kico ta puntualidad. Hopi a siña hiba discursonan den publico y a siña organisa actividadnan. Un cantidad grandi di hendenan den nos comunidad a haña e oportunidad di desaroya nan talentonan diverso den nos club. Pero mas cu tur De Trupialen ta pa tur cu a forma parti di dje, un lugar cu tabatin alegria, pero tambe tabata tin tristeza, especialmente si nos recorda e miembronan cu a bai laga nos den un forma inespera. Un lugar caminda a nace amistadnan pa resto di nan bida. Esey tabata y ta sigui ta "DE TRUPIALEN". Un fuente di alegria, talento y crecemento di nos yiunan pa un bon futuro.
Esaki ta en corto un tiki di historia di DE TRUPIALEN den su sesenta añanan. E articulo aki ta un introduccion di un serie di articulonan cu lo bai sali den e proximo lunan prome cu nos lustro na Januari 2013. Nan lo bai ta articulonan cu potretnan di actividadnan di DE TRUPIALEN durante e 60 aña. Asina pa nos rebiba serca hopi hende momentonan bunita y logronan di e grupo famoso aki DE TRUPIALEN. Nos ta aprecia boso comentarionan riba esakinan y si tin persona nan cu un tempo tabata forma parti di DE TRUPIALEN, kier comparti cu nos recuerdonan di nan tempo, si nan tin potret, presta nos nan, pa nos scan nan y asina engrandece nos archivo. Por tuma contacto cu nos via email: detrupialenaruba@hotmail.com" Tambe nos ta riba Facebook: detrupialenaruba. Tag nos y nos ta aceptabo como nos friend y asina bo por sigui nos y compaña nos riba e Caminda pa nos 60 aña.
DE TRUPIALEN ta sigui deleita pa diberticion di nos hubentud di awor, na memoria di nos bieuwnan cu a bai laga nos y como un herencia cultural inolvidabel pa futuro. 60 aña so nos tin!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
 |
Mustra/Kita e formulario di comentario
