|
E vitrina final di Art Rules Aruba a produci un tremendo spectaculo di cuater ora, cual a cuminsa cu un exhibicion di fotografia y moda, y a culmina cu un produccion di teatro riba un gran escala, aumenta cu video y film, baile, musica y presentacionnan.
Mas cu 200 hoben local a participa den e edicion di Art Rules Aruba di e aña aki, produci pa Ira & Ayra Kip di The Pancake Gallery Foundation. Nan a experiencia dos siman intensivo di tayer den ocho disciplina creativo, cu Fotografia, Moda, Film, Baile, DJing, Arte Urbano, Musica & Presentacion y Teatro formando parti di e curiculo. E lesnan a tuma luga na Atelier 89 na Oranjestad y na Madiki Kavel, unda e grupo di artistanan urbano a practica loke nan a siña door di pinta un pintura gigantesco riba muraya. Art Rules Aruba, den su di tres edicion, a gradici mayornan y sponsornan den e sector priva pa nan contribucionnan, cualnan a permiti e muchanan pa habri nan halanan y practica auto expression, creatividad y encontra nan mesun voz. Den un auditorio completamente yen, e publico a wordo entreteni cu un serie di film inteligente y sorprendentemente honesto, presentacionnan profundo cu a pone nan pensa, piesanan teatral hilarico, mei-mei di cual tabatin segmentonan di baile anima y sin inhibicionnan, como tambe un tributo cariñoso na Ayra y Ira Kip su maestronan di scol basico, for di e scol na San Nicolas di cual nan ta alumnonan. Un pabien ta bai na e ekipo di maestronan internacional y local, kendenan cu hopi talento a yuda desaroya e hubentud talentoso di Aruba, y a inspira nan pa subi na un nivel impresionante di originalidad y profesionalismo. Na nomber di The Pancake Gallery Foundation, danki na tur e sponsornan generoso cu a haci e dos simannan fantastico posibel, plantando e simiñanan artistico den e curasonnan di tur esnan cu a participa.
 |
Mustra/Kita e formulario di comentario
