| Santa Rosa y AIB Bank ta invita pa un charla interesante |
 |
 |
| Tuesday, 24 July 2012 10:57 |
 Durante e ultimo tempo por a mira un crecemento enorme den e interés pa inicia cu projectonan di agricultura, cria, piscamento, projectonan hydrophonico, producción di honing y hopi mas productonan local cu sigur ta yuda engrande nos sector primario.
Nos por confirma esaki mirando con grandi e Mercado di Santa Rosa a bira for di su comienzo na 2011 compara cu awendia na unda cu esaki ta conta cu un cantidad grandi di productornan cu ta bin bende tur sorto di productonan fresco, produci y cultiva aki na Aruba mes. Santa Rosa como parti di su responsabilidadnan pa sostene nos sector primario ta sirbi tambe como un departamento pa duna tur sorto di información clave pa yuda nos productornan saca probecho optimal di nan producion. Pa e motibo aki tambe cu Santa Rosa cohuntamente cu Aruba Investment Bank ta organiza un charla informativo con pa desaroya bo negoshi den nos sector primario y saca mas beneficio di esaki. E charla lo tuma lugar, Diaranson, dia 25 di July na Club San Martin na Santa Cruz for di 7 PM-9 PM. Durante e anochi aki, Sra. Nathalie Maduro, Management Team Lid pa Santa Rosa lo inicia e anochi cu información encuanto di e registro oficial cu ta tumando lugar y propósito di esaki y después Sra. Gaby Croes, Analista pa Aruba Investment Bank lo duna un charla sumamente interesante encuanto di e desaroyo di bo negoshi y lo hasi un encuesta participativo. Tambe nos lo tin representantenan di IDEA pa duna información encuanto di un curso cu pronto lo inicia via Ensenanza pa Empleo. Pa medio di esaki tambe Santa Rosa kier a invita tur nos productornan local di Aruba pa bin participa na e charla aki y wak con abo por desaroya bo negoshi y aporta na e sector primario di Aruba. E charla completamente gratis y nos tas pera di conta cu boso participación na esaki. Si tin cualquier pregunta por tuma contacto cu Sra. Glenda Bareno of Randy Maduro na Santa Rosa na 5858102.
|
Mustra/Kita e formulario di comentario
