DCA ta uni na e homenahe nacional di Sr. Hubert Lio BOOI

Tuesday, 24 July 2012 12:20

Departamento di Cultura Aruba (DCA) ta hopi contento di por anuncia tambe pa e homenahe nacional na Sr. Hubert Lio Booi, kende ta un baluarte grandi di cultura, artista multifacetico, promotor y prome director di antes Instituto di Cultura Aruba (I.C.A.).

Den servicio na DCA nos tin su prome secretaria den persona di Sra. Marlene Lampe, Sr. Robert Scharbaay, kende a haci diferente funcion y Sra Maritza Erasmus, un artista y escultor profesional, tur hunto trahando for di tempo di I.C.A

Ora papia di Sr. Juan C. Padu Lampe y Sr. Hubert O. Lio Booi ta dos persona cu un trayectoria grandi den cultura, artsita multifacetico y ambos co-autor di nos himno ‘Aruba Dushi Tera’. Kendenan ainda ta celebrando mei mei di nos. Semper nos ta recorda Sr. Rufo Wever d.f.m. kende tambe ta co-autor di nos dushi himno nacional. Sr. Lio Booi ta autor tambe di e himno nacional di Boneiro.

Sr. Hubert Odulio ‘Lio’ Booi a nace na Nikiboco, Boneiro riba dia 25 di juli 1919. Mayoria parti di su bida el sirbi nos pais Aruba. Kende cu for di 1937 a bin establece akinan.

Como hoben el a cuminsa traha na ‘Hollandsche Banki Unie’ den departamento di contabilidad. Despues di sigui diferente diferente curso Hubert ta bira ‘Algemene Procuratiehouder’ di e banco unda el a traha 23 aña largo.

Den su carera profesional Lio a traha na 1960 na ‘Water en Energiebedrijf N.V.’ (W.E.B.), den departamento di contabilidad. Na e mesun aña E ta bira Hefe Suplente na Toeristenbureau. E tabata Hefe Suplente tambe na Arubaanse Voorlichtingsdienst (banda di e conocido poeta Nicolas A. Piña Lampe).

Na 1963 ta bira Hefe di Departamento di Cultura y Educacion (Cultuur en Opvoeding).

Di 1978 pa 1980 Hubert ta Hefe di Instituto di Cultura Aruba, pa despues bay cu pensioen.

Sr. Booi ta un persona dedica, versatil y cu amor grandi pa su cultura y idioma Papiamento.

Premio y Condecoracion ricibi:

- “ANV Neerlandia Prijs”, como miho alumno den idioma Hulandes;

- “Orden Francisco de Miranda”;

- “Officer in de Orde van Oranje-Nassau”;

- “Gran Mariscal de Ayacucho”;

- “Aruba Quality Foundation Vision 2005”;

- “Paul Harris Fellow Award” di Aruba Rotary International;

- Noveno Festival Internacional di teatro dedica na Hubert Lio Booi na 1994;

- Reconocimento di ‘Cultureel Centrum Aruba’ (CCA) na 1994;

- Homenahe y exposicion dedica na Hubert (Lio) Booi organisa pa Biblioteca Nacional Aruba, titula “ E Flamingo Arubiano” na 1998;

- ‘Premio Motito y Rufo Wever’ ta duna homenahe na Hubert ‘Lio’ Booi;

- Premio Papiamento “Cadushi di Cristal” na 1999;

- Cuidadano di Honor di Bonaire na 2000;

- Reconocimento door di ‘Comision Celebracion Dianan Nacional’ en conexion cu “25 aña Himno y Bandera y 15 aña Status Aparte”, na 2001;

- Union Mutualista Bonaireano, na 2001.

Interesnan:

Sr. Booi tin conocemento di diferente idioma entre otro Latin cu el a siña cerca Pater Rogmans na Noord. Ruso el a studia na Den Haag cerca e maestra Natasha de Vries di Universidad di St. Petersburg.

Actividadnan social:

Sr. Lio tabata promotor y motor tras di bida cultural na Aruba y di idioma Papiamento.

Co-fundador di ‘Circulo Arubano Pro Arte’ (“Arubaanse Kunstkring”). Miembro di directiva di ‘Sociedad Bolivariana’. Motor tras di e organisacion “De Trupialen” hunto cu Frere Alexius. Sr. Booi a skirbi pa “De Trupialen” hopi cantica manera “Chanita” y Sr. Padu Lampe tabata pone e musica. E tabata organisador di exposicionnan “Arte Popular”.

E tabata Secretario di Comision di Papiamento (spellingscommissie Daantje en Maduro).

Y miembro di Comision “Himno Aruba Dushi Tera”.

Actividadnan artistico:

- Actor:

Sr. Hubert Booi a actua den diferente comedia;

- Autor y poeta:

Autor di diferente obranan di teatro manera: ‘E Perla di Caribe’, ‘Triunfo di un piscado’, ‘Golgotha’ y ‘Amor di Kibaima’. Hubert a skirbi diferente ensayonan y cuenta.

Sr. Hubert tin poesianan dedica na su señora Floraquentina Coronel, su yiunan, pero tambe el ta skirbi poesia pa diferente ocasion.

Autor di hopi texto pa cantica pa mucha cu ta forma ya parti di nos repertorio tradicional. E himno nacional di Boneiro ta skirbi pa Sr. Hubert Lio Booi.

Hopi trabou di Sr. Booi no ta publica ainda. Gran parti di su trabou ta den e coleccion di “Ito Tromp” den e departamento di ‘Arubiana’, na Biblioteca Nacional Aruba. E coleccion ta consisti di leyenda, ensayo, cuenta, poesia, cantica y obranan teatral.

- Pintor:

Sr. Hubert a haya les di pintura di maestro Luigi Tossati na Costa Rica. El a expone diferente biaha hunto cu otro pintornan di Aruba por ehempel den ‘Vision’ Aruba. Na juni 1998 Biblioteca Nacional Aruba a organisa un exposicion di cuadro titula, “E Flamingo Arubiano”.

- Musico:

El a skirbi masha hopi musica y el a traduci hopi cantica.

- Orador y declamado:

Na diferente ocasion cultural Sr. Hubert ta declama poesia. E ta wordo acerca regularmente pa diferente instancia como orador y maestro di ceremonia. E ta duna discurso riba diferente tereno por ehempel: Desaroyo di Papiamento, Cultura di Aruba y Cultura Griego...

Docente di Papiamento y Pintura

Otro actividadnan:

Sr. Hubert tabata narador di e programa di television masha gusta “Nos Tera”.

E tin un sin fin di trabou literario: pa teatro, texto pa cantica, traduccionnan, Radio Novela (adaptacion y traduccion), ensayo, storia cortico y poesia.

Departamento di Cultura Aruba (DCA) ta orguyoso di Sr. Hubert Lio Booi, kende ta un persona cu ta sirbi como ehempel pa hopi di nos cu su trayectoria amplio riba tereno cultural na Aruba.

Director, directiva y personal di DCA ta felicita Sr. Booi, su yiunan, famia y amigonan cu e 93 aniversario.

Pabien Shon Lio. Pabien Aruba. Aruba ta di fiesta.