| Rene Herdé: "Asuntonan cu tin decadanan ta warda solucion ta haya solucion duradero awor" |
 |
 |
| Tuesday, 24 July 2012 16:35 |
 "No tin un tema mas crucial den mundo awor aki cu e tema di energia. E disponibilidad y prijs di energia ta determinante pa calidad di bida di hende tur rond di mundo. Pa decadanan caba nos na Aruba ta papia di un maneho pa sigura cu nos pueblo lo keda haya energia y awa na un prijs pagabel, pero un maneho asina no a wordo presenta. E prijs cu pueblo tabata y ta paga ta halto y te awor no tabata tin maneho pa yega na un solucion duradero. Fraccion di AVP ta sostene e maneho cu gobierno di gabinete Mike Eman a presenta pa sigura nos pueblo di energia stabiel y awa di calidad na un prijs confiabel pa largo plaso. Esaki ta posibel door di e combinacion di eficiencia di e planta di energia y un parti substancial di energia di fuente natural. Pasobra tanten cu nos depende di petroleo, ni cuanto nos aumenta e eficiencia, e prijs ta keda instabil y halto, pa motibo cu nos no tin ningun control riba e prijs di petroleo. E energia alternativo ta pesey esencial den logra e meta di stabilidad y prijs pagabel pa largo plaso." Esaki ta djis un di e temanan importante cu tin decadanan ta warda solucion. INFRASTRUCTURA, PENSIOEN Y ENSEÑANSA Den areanan di infrastructura nos tin decadanan ta papia di drecha nos ciudadnan y nos barionan, di mehora e calidad di infrastructura di nos pais y awor e ta sosode. E problemanan cu fondonan di pensioen, tanto e fondo di pensioen di behes (AOV) como e fondo di pensioen di empleadonan publico (APFA) tin decadanan ta warda solucion. Bou di gobiernonan anterior a logra solucionnan chikito of parcial, pero nunca a presenta un maneho pa atende cu e problemanan di pensioen den un forma integral y cu ta envolve tur esnan concerni. E gobierno di gabinete Mike Eman y e "di ocho parlamento di Aruba, a logra restructura y trece cambio den e fondonan, cu ta sigura pa un periodo largo e siguridad di e fondonan aki y asina sigura e entrada di esnan cu ta depende di e pensioen pa nan entrada. Den area di enseñansa a logra entre otro e "boekenfonds" cu ta un di e formanan pa controla e costo di enseñansa y sigura cu pa motibo di e costo ningun mucha ta keda sin bay e scol cu ta miho pe. Pa decadanan a purba crea un fondo pa buki asina. Awor porfin a logra pa scolnan publico. Ta spera cu pronto scolnan priva tambe lo participa pa sigura tur mucha e acceso na scol na un miho prijs. LABOR, SALUBRIDAD Pa decadanan largo a papia di cambionan den leynan laboral pa duna mas siguridad na e trahado y minimalisa inhusticia den mercado laboral. E leynan cu cambionan importante ta na caminda pa parlamento! Den area di salubridad a logra controla costo medico y na mes un momento presenta un maneho cu ta duna mehoracion pa futuro. Mientras cu rond di mundo ta purba sigura pueblonan acceso pagabel na salubridad, aki na Aruba nos tin un sistema cu otronan ta anhela pa logra. Djis wak e discusionnan cu tin na Merca riba e tema aki. E plannan pa mehora e hospital tin decadanan den discusion pero sin accion. Awor tin un plan pa renoba hospital di Aruba y sigura Aruba un centro medico di bon nivel pa hopi aña. E discusionnan riba temanan cu tin decadanan ta warda solucion ta hayando solucion awor! Y nan ta solucionnan responsabel y duradero. E di ocho parlamento di Aruba cu placer lo trata tur e plannan aki den e lunanan cu ta bin, pasobra nan tur ta mehora e calidad di bida na Aruba. Y loke ta bon pa Aruba, ta bon pa nos tur! Comentarionan (6)Mustra/Kita comentarionan ...
PUEBLO, despues di un corto AUSENCIA di Parlamentario Herde, tabata PENDIENTE pa por sigui DESFRUTA di BARBARIDADNAN cu e ta trece dilanti. E ta bisa:"Fraccion di AVP ta sostene e maneho cu gobierno di gabinete Mike Eman a presenta pa sigura nos pueblo di energia stabiel y awa di calidad na un prijs confiabel pa largo plaso". PUEBLO sa cu e GOBIERNO actual NO a haci NADA den WEB, cu no ta saca DIVIDENDO so. Tanto ta e proyecto na VADERPIET, como e RECIP Y SWRO na WEB, ta Proyectonan di GABINETE ODUBER. Tambe e ta bisa:"E problemanan cu fondonan di pensioen, tanto e fondo di pensioen di behes (AOV) como e fondo di pensioen di empleadonan publico (APFA) ...a worde restructura..! Cu un SOLUCCION pa AUMENTA e PREMIE di AOV pa henter COMUNIDAD y LAGA otro GOBIERNONAN paga APFA den 15 aña, no mester di NADA di ELOGIO. BABBA, Bon GOBERNACION kier meen, haci BON USO di fondonan PUBLIKO, y no MALGASTA ESAKINAN den BARBARIDADNAN di PROYECTO, manera e BOOTJE KOMT ZO, di Wubbo OCKELS.
,
July 24, 2012
...
Enseyansa, no tin lugar pa muchanan Arubiano na Skol. Stranjero hasta Ilegal ta tuma tur lugar.
Pensioen, ta un papel boso a firma te cu awe. Cuminsa paga locual boso no a draag af na APFA for di anja pasa. Infrastructura, no papia mes di caya grandi pasobra mi ta hanja mal beis. Labor, a drecha pa mas stranjero hanja y mantene nan trabow, Aubiano mes ta na cas ta cobra onderstand miserabel. Salubridad, Azv no cubri casi nada mas y nos mes mester cumpra remedi. Afspraak cu huisdokter of specialista a bira scars. Mas hende ta muri compara cu anjanan anterior. Justicia (bo a lubida), Criminalidad a subi drasticamente, manera tur hende sa caba. WIld wild west, polisnan jong ta tuma justicia den nan man. Social (tambe bo a lubida), mas pobresa y mas Arubiano ta cobra onderstand. Economia (tambe bo lubida) tambaleando cu Valero y turismo nos no sa ken pa kere. Otmar, hotelnan of statistics ariba internet.
,
July 25, 2012
Duna Comentario y/of Comparti riba Social Medi |
Mustra/Kita e formulario di comentario
