| Banco Central di Aruba: Reserva di divisas a baha |
 |
 |
| Tuesday, 24 July 2012 19:12 |
 Banco Central di Aruba (BCA) ta conclui den su Relato Mensual di April 2012 cu e cantidad di placa den circulacion na final di April 2012 a baha cu Afl. 15,3, causa principalmente pa un caida di Afl. 14,6 miyon den e reserva di divisas netto (excluyendo diferencianan den revaluacion di oro y reservanan internacional) te na Afl. 1.207,3 miyon na final di April 2012. Ademas, e componente domestico di e cantidad di placa den circulacion a baha levemente cu Afl. 0.6 miyon, atribui na un caida di Afl. 3,1 miyon den transaccionan no relata na credito y un subida di Afl. 2,5 miyon den credito domestico. E crecemento den credito domestico wordo causa pa un aumento di Afl. 7,8 miyon den debe di e sector priva na e sector bancario y un caida di Afl. 5,3 miyon den debe netto di e sector publico na e sector bancario. E subida den debe di e sector priva na e sector bancario ta refleha expansionan den credito na empresa y hipotecanan pa construccion di cas di Afl. 8,3 miyon (+0,7 porciento) y Afl. 2,7 miyon (+0,3 porciento), respectivamente, mientras credito na consumidor a baha cu Afl. 3,3 miyon (-0,6 porciento). E indice di prijs di consumo (CPI) di April 2012 a registra un subida di 2,6 porciento compara cu e mesun luna di 2011. E principal contribuyentenan na e crecemento aki tabata vivienda, cuminda y transporte. Inflacion excluyendo e componentenan di cuminda y energia (cual parcialmente ta afecta e componentenan di vivienda y transporte) a subi cu 0,5 porciento compara cu April 2011, causa pa prijsnan mas halto den e componente di transporte excluyendo gasoline y diesel (e.o. cambio di azeta, greasemento, y labamento), comunicacion (e.o. carchi di telefon prepaga) y restaurant y hotel (e.o. consumo di cuminda y bebida pafor di cas). E promedio anual di e tasa di inflacion a yega na 5,4 porciento na April 2012. E cantidad di turista a alcansa 78.160 na April 2012, 1,8 porciento menos cu April 2011. E bahada aki a wordo causa principalmente door di caidanan den e cantidad di turista di Merca (-2.959 of -5,7 porciento), Italia (-425 of -75,5 porciento) y Colombia di (-398 of -23,9 porciento). Di otro banda, na April 2012, e cantidad di turista a crece for di Venezuela (+831 of +6,9 prociento), Argentina (457 of +113,1 porciento), y Curaçao y otro mercadonan Hulandes den Caribe (+374 of +20,6 porciento), compara cu April 2011. E cantidad di turista di crucero a aumenta cu 25,8 porciento te na 69.852 na April 2012 compara cu e mesun luna di e aña anterior. E cantidad di barconan a subi levemente na 33 na April 2012 compara cu 30 na April 2011. Entrada di impuesto a suma Afl. 74,5 miyon na April 2012, un aumento di Afl. 15,4 miyon (+26,1 porciento) compara cu e mesun luna di e aña anterior. E crecemento aki ta atribui principalmente na subidanan den e ingreso di impuesto riba entrada y ganashi (+Afl. 8,7 miyon of +32,7 porciento), y riba mercancia (+Afl. 5,2 miyon of +28,9 porciento). Tambe, ingreso di impuesto riba propiedad, divisa y e entrada no relata na impuesto tambe a subi cu Afl. 0,7 miyon (+50,0 porciento), Afl. 0,6 miyon (+16.7 porciento), y Afl. 0,5 miyon (+9.8 porciento), respectivamente, mientras cu entrada procedente di benta di negoshi (B.B.O.) a keda mescos compara cu April 2011. |
Mustra/Kita e formulario di comentario
De Meza ta bay check si 24ora.com a lesa e document di BCA robez.
I Michele ta puntra su mes dicon su chicken down effect no a functiona.
Paso ta poco dia pasa Mike i Otmas a bisa asina duro cu cos ta bayendo hopi bon cu e economia i e ta creciendo