| Gobierno y comercio ta sostene Joe Laveist Sport Camp 2012 |
 |
 |
| Tuesday, 24 July 2012 19:19 |
 Diamars merdia Minister di Finanzas, Mike de Meza a ricibi un delegacion consistiendo di Presidente di Aruba Sport Unie, Sr. Gerald ‘Jerry Franca’ y patrocinadonan di e Joe Laveist Sport Camp. Aki no solamente a duna detaye di e programa cu lo cuminsa otro siman, pero tambe a haci entrega di un poster cu ya caba ta pega den henter e districto di San Nicolas, invitando muchanan di 8 pa 15 aña pa participa.
Den cooperacion cu Johnson’s Enterprises N.V. a presenta e poster pa e campamento deportivo cu lo cuminsa dialuna proximo y ya caba ta conta cu 150 mucha. Inscripcion ta keda habri durante transcurso di e siman aki, pa medio di oficina di ASU. E programa di e campamento ta structura di tal forma cu e muchanan ta reparti den gruponan segun nan edad. Di 8 y 9 aña, 10 y 11, etc. Cada grupo lo conoce y practica atletismo, baseball, softball, karate, futbol, taekwondo y beach volleyball. Tur variedad lo tuma lugar den Joe Laveist Sport Park di dialuna pa diabierna y sin ningun costo pa e participantenan. Relaciona cu esaki, Sr. Franca a gradici formal y publicamente e apoyo ricibi di Minister Mike de Meza. Danki na e sosten como tambe ayudo di Subsidiecommissie y sector priva, a percura pa tur mucha y hoben haya tur dia di come y di bebe cu ta saludabel. Tambe a cubri e gastonan pa por a busca profesionalnan di deporte den cada ramo, percurando asina cu e muchanan ta haya e instruccion adecuado. Ta tuma henter e siman pa siña e muchanan riba e importancia di deporte den nan formacion; tanto como disciplina, pero tambe desaroyo di un futuro. E idea ta cu lo acerca Gobierno den un futuro cercano cu e meta pa otro aña e proyecto aki lo por tin espacio y recurso pa por expande pa otro barionan y asina amplia e programa habriendo caminda pa mas mucha di Aruba por disfruta y beneficia di dje. Apesar cu ta papia di un campamento deportivo, tambe lo enfoca riba otro aspecto importante di e formacion di un hoben. Lo inclui den e programa un dia riba cual nan ta haya un tour bus durante cual ta educa nan culturalmente. Kier laga nan conoce nan isla di un manera cu normalmente nan no ta haya oportunidad pa haci. Esaki ta nifica cu e campamento ta consisti di cuater dia di deporte y riba e di cinco, lo siña nan kico tur Aruba tin, su flora, fauna, historia y cultura. Minister Mike de Meza den nomber di Minister di Deporte y di henter Gabinete Mike Eman a gradici ASU pa e trabou cu nan ta haciendo y a expresa su satisfaccion di wak cu e campamento aki un bes mas ta tumando luga. E Mandatario a bisa cu “E ta un sport camp cu bo ta wak tur aña hopi mucha ta haci uso di dje. Hopi ta e muchanan cu no ta haya chens di bay afo of haci algo durante vakantie. Esaki ta un bon chens cu nan por bin haci actividadnan sano, actividadnan deportivo na Joe Laveist Sport Park. Tambe el a gradici e representantenan di Johnson’s Entertaprises pa nan sosten na e actividad aki asumiendo nan papel di ciudadano corporativo. “Nos ta masha contento y gradici ora tin compania cu ta contribui na e bienestar di comunidad. Mi sa cu esaki no ta prome ni ultimo biaha cu Johnson’s Enterprises lo coopera cu e actividad aki y otro actividadnan.” Gabinete Mike Eman ta reitera cu nan ta apoya tipo di proyectonan aki cu ta stimula e actividad fisico y ta yuda muchanan, cu di otro forma no tin moda pa bay un campamento, pa tin un actividad sano y educativo pa haci durante vakantie. E ta cuadra den e vision di un Aruba nobo caminda barionan ta mas activo riba tereno deportivo, pero tambe social. Y si tin un caminda cu mester planta e simia ey, ta den e mucha y hobennan cu ta carga e vision den futuro. D.r.p.d. por mira Sr. Jonathan Tromp y Sr. Ian Johnson di Johnson’s Entertprises entregando e poster di e campamento deportivo Joe Laveist na Minister di Finanzas, Sr. Mike de Meza den presencia di President di Aruba Sport Unie, Sr. Gerald ‘Jerry’ Franca na sala di prensa di oficina di Gobierno di Aruba. |
Mustra/Kita e formulario di comentario
