| Minister Mike de Meza: Den un aña Aruba ta conta cu un Joe Laveist Sport Park renoba y caminda por practica tur clase di deporte |
 |
 |
| Tuesday, 24 July 2012 19:16 |
|
Minister de Meza a bisa cu tur cos ta canando su caminda corecto pa e plannan tin aprobacion di e departamentonan di gobierno concerni prome cu nan bay destaho publico y consecuentemente na e ehecucion di e trabounan. E renobacion y ampliacion y como tal, mehoracion di e facilidad cu ta Joe Laveist Sport Park ta un proyecto cu a conoce su prome fase na final di 2009 y inicio di 2010. E di dos fase ta uno cu ta parti den dos, segun Minister de Meza “ya cu ta trata di un proyecto hopi grandi.” E plannan ya a pasa den man di Gabinete Mike Eman cu a mande na su turno pa Departamento di Asuntonan Economico pa revisa y aproba y awo nan ta na Fondo Desaroyo Aruba pa haya e financiamento necesario. Minister di Finanzas tin entendi cu den un pa dos siman nan ta pasa pa e proceso di destaho publico. E gastonan di planificacion cu ta core den mey miyon florin ta wordo cubri dor di Gobierno mes mientras cu tur recurso pa e construccion ta financia dor di FDA. E proyecto ta uno cu facilmente ta surpasa 5 miyon florin, segun e mandatario. E tereno di baseball y futbol ta bay wordo drecha caminda lo haya yerba y tur e acesorionan necesario pa nan funcion. Pa loke ta e tribuna, esakinan lo haya nan debido reparacion den tur nan structura, mescos cu e dak y murayanan. Cu e splicacion aki Minister de Meza a mustra cu no a laga nada afo. Minister Mike de Meza a splica cu “Fin di luna aki, mas tarda mita di Augustus e plan y pintura di e di tres fase lo ta cla pa Gobierno haya. Esaki ta sigui cu e construccion di un dome full cera caminda lo por practica dos deporte simultaneamente, pero tambe lo por sirbi como un facilidad cu airco pa realisacion di congreso y tipo di actividadnan similar.” E dome lo tin capacidad di rond di 300 persona. E parti cu ta conecta Pastoor Hendrikstraat, entre e dos portanan grandi tin bisti riba dje pa bin cu un Museo di Deporte. Esey ta den diseño awo pa despues Aruba Sport Unie aproba. “Sigur sigur, dentro di un aña nos mester tin un Joe Laveist Sport Park cu ta full renoba y cu lo wordo uza pa tur sorto di deporte riba un nivel sumamente halto caminda e atletanan por ta hopi contento y e districto di San Nicolas y becindario lo ta hopi orguyoso di un bes mas por tin Joe Laveist Sport Park drecha,” Minister Mike de Meza a bisa. Comentarionan (2)Mustra/Kita comentarionan Duna Comentario y/of Comparti riba Social Medi |
Mustra/Kita e formulario di comentario
