Den combersacion cu mediador di gobierno, Anselmo Pontilius a puntre riba e reunionnan cu tin andando na e momentonan aki, relaciona cu diferencianan di opinion grandi cu tin entre e trahadornan di construccion y WAB.

Esaki ta relaciona cu un CAO cu ta den negociacion pa varios luna caba, y cu mediador ta purbando pa nan yega na otro. Anselmo Pontilius a splica cu tin varios intercambio di proposicion of oferta ta tumando lugar caminda tin como 2 pa 3 punto cu e partidonan envolvi no por haya otro, locual ta normal den e tipo di negociacionnan unda ta discuti riba aumento di salario. E partidonan envolvi a yega di bay Parlamento y Gobierno, pero segun mediador esaki lo no resolve e discusion cu tin na mesa. Ta e partidonan mes tin cu tuma e paso pa un consenso. Mediador a splica cu siman pasa tabata tin discusionnan fuerte na mesa y entre diadomingo cu dialuna mas intercambio di proposicionnan nobo a bin na mesa. E negociacion ta sigui diaranzon awor pa 4.30 or atardi y cu dos proposicion di cada partido mediador Pontilius lo duna conseho pa purba cera e distancia cu tin y yega na un acuerdo cu por ta valido te cu December 2013. Como mediador e por presenta alternativanan pero e semper ta prefera pa e partidonan mes convence otro. E contratistanan ta haya cu nan tin cu lucha contra un competencia inhusto cu nan tin cu biba cune pafo, y na mes momento e trahadornan ta bisa cu pa añanan caba nan no ta haya un aumento considerable di salario. Hecho ta cu tin aumento di salario riba mesa y tin acuerdo caba cuanto lo ta e aña aki pero e diferencia ta sinta cuanto e lo bira otro aña. En todo caso, mediador ta spera cu diaranzon awor STA por presenta e resultado y e negociacion yega na su final. Mediador a splica tambe cu na e momentonan aki tur contratista tin trabao y no mester lubida esaki. No obstante WAB a bisa den parlamento y cerca gobierno cu nan ta haya cu nan cu tin un CAO cu e sindicato, tin condicionnan di trabao mas halto cu otro contratistanan cu no tin esaki y cu por haci ofertanan cu prijs mas abao y nan ta haya mas trabao. Segun Pontilius parlamento a priminti di traha riba esaki pa medio di dos ley, cu lo trece un alivio y lo structura e situacion aki.

Comentarionan (0)

Mustra/Kita comentarionan

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi