| Mediador Pontilius ta convenci cu UEA y Gerencia ELMAR lo yega na otro diaranzon awor |
 |
 |
| Tuesday, 24 July 2012 22:46 |
|
Den un entrevista cu mediador di gobierno, Anselmo Pontilius, el a elabora tocante e reunion cu tabata tin dialuna entre e Comision cu gobierno a lanta, UEA y Gerencia di ELMAR. Mediador di gobierno tambe ta miembro di e comision, y el a splica cu e comision a ser instala despues cu tabata tin diferencianan di opinion entre e partidonan, y nan tabata acerca gobierno y e mediador mas cu un biaha, pa intermedia den e puntonan di discrepancia entre e sindicato y e gerencia di e compania. Esey mas tanto despues cu e miembronan di staf a gana nan Caso den Corte, cu tabata tin accion y diferente debate entre e gerencia y e dirigencia di UEA, loke a trece cune un situacion caminda e partidonan no a bolbe sinta na mesa cu otro. Aworaki mediador tin e tarea di trece e partidonan na mesa bek, pa trata di resolve e diferente aspectonan pendiente pa wordo resolvi, y mas cu tur cos pa restablece e confianza y traha caminda pa e partidonan sigui dialoga na mesa. Mediador a informa cu tin diferente punto cu ta riba un bon caminda pero e puntonan cu bin dilanti aworaki a trece cune diferencianan di opinion riba cualnan e comision a reuni dialuna cu a pasa, lo sigui diaranzon awor y e ta spera cu finalmente lo keda resolvi di 3 pa 4 punto, y cu di eynan padilanti e partidonan por sinta na mesa sin presencia di e comision. E cambionan cu mester atende ta fundamental pa e compania mes su existencia y pa e servicio di comunidad. El a sigui splica cu e minister di utilidadnan a scoge un comision forma pa tres persona pa sinta cu gerencia di ELMAR y WEB. WEB a introduci su structura hopi tempo pasa y esaki ta cana bon. ELMAR tambe kier cambia su structura y ta importante pa haci esaki, segun Pontilius. El a enfatiza cu respet entre e dos partidonan ta importante na momento di trece cambionan. |
Mustra/Kita e formulario di comentario
