| Comision a haci su trabou pero despues gerencia di ELMAR y UEA mester sigui atende cu otro |
 |
 |
| Wednesday, 25 July 2012 22:38 |
|
Pontilius, un persona bon conoci den mundo di sindicalismo y cu despues a bira Mediador, a splica cu den e reunionnan di siman pasa y ayera, a logra yega basta leu compara con nan a yega haya e situacion. Masha importante ta cu e partidonan a logra yega na un consensus pa firma un document cu e comision a concipia den cual tres di e puntonan cu a wordo hiba te Minister, a wordo resolvi. Tin e punto of aspecto financiero cu mester sigui discuti ainda riba dje. Mediador a señala tambe cu e dirigentenan di e sindicato y ELMAR tin un tarea grandi pa sigui atende cu otro sin cu e comision ta presente. Y na caminda tin e discusionnan pa un CAO nobo. Naturalmente, por surgi descrepancianan. E comision a haci un parti di su tarea y ta spera di por ta na mesa otro siman caba riba e diferencia di opinion cu tin riba e aspecto financiero. Si logra esaki, segun Pontilius, UEA tin e tarea grandi pa sigui atende cu e cambionan grandi cu ELMAR ta proponiendo. Tur esaki por trece resistencia, pero tur esnan envolvi mester ta hunto y palabra riba e diferente tipo di reunionnan cu lo bay tin. E comision a ofrece pa duna nan colaboracion den esaki. E protocol cu a wordo firma, Pontilius a splica, a atende cu e problemanan interno cu tin andando y for di accionista a haya e tarea pa intermedia den esaki. Ta trata di busca e solucionnan cu ta mas rasonabel pero cu por yuda tambe trece trankilidad riba un caminda mas largo. E Mediador no tabatin ningun comentario negativo di e reunion ya cu for di prome instante e partidonan a acepta cu e comision cu por yuda guia e discusionnan, cual ta yuda hopi. E partidonan a wak e document redacta, a haci cambio pa despues a firma esaki. E comision tin tarea pa topa cu e accionistanan y ta spera di por ta asina leu cu lo por topa atrobe otro siman. Despues di finalisa e puntonan di discusion, tin e tarea ainda cu gerencia ta bay atende cu tur e cambionan interno cu mester tuma luga y con ta bay atende cu esaki, principalmente den e relacion di gerencia cu sindicato. Rector di Universidad, Glenn Thode, di su banda a comparti e pensamento di Pontilius. El a enfatisa cu e comision no ta un partido pero a trata di facilita un proceso. E por bisa si cu nan ta masha gradici cu ambos partido, gerencia y UEA, a duna na e miembronan di e comision. Esaki a haci cu nan por a haci nan trabou mas bon pa e partidonan yega na otro na mesa. |
Mustra/Kita e formulario di comentario
